خرم شہزاد خرم

پشاور (مانیٹرنگ سیل /جنگ نیوز) مولانا فضل الرحمن نے کہا ہے کہ متحدہ مجلس عمل کا اتحاد قائم رکھنا چاہتے ہیں اور جماعت اسلامی کو انتخابات میں حصہ لینے کے لئے قائل کریں گے،نوازشریف تنہافیصلے نہ کریں، پشاور میں پریس کانفرنس کے دوران انہوں نے کہا ہمارا کسی سے انتخابی اتحاد کا ارادہ نہیں اور مقامی سطح پر ہم نے سیٹ ایڈجسٹمنٹ کی اجازت دیدی ہے، اس وقت مکمل شفاف انتخابات کی توقع رکھنا درست نہیں ہم نے انتخابی نشان کے لئے باقاعدہ درخواست دی ہے ۔ انہوں نے میاں نواز شریف پر واضح کیا کہ وہ تنہا فیصلے نہ کریں قوم کی خواہش کو بھی مدنظر رکھیں مرکزی سیکرٹری اطلاعات مولانا محمد امجد خان سے گفتگو کرتے ہوئے کہا ہے کہ جے یو آئی کتاب کے نشان پر ہی الیکشن لڑے گی۔ مجلس عمل خصوصاً جے یو آئی کے امیدواروں سے کہا ہے کہ وہ انتخابی مہم تیز تر کر دیں وقتی خبروں پر توجہ نہ دیں۔ انہوں نے کہا کہ تمام جماعتوں کو یہی مشورہ دیں گے کہ وہ انتخابی میدان میں اتریں تاکہ ماضی میں جبر کے ساتھ غلط فیصلہ کرنے والوں کا مقابلہ کیا جا سکے۔ آن لائن کے مطابق انہوں نے کہا میری اے پی ڈی ایم کی کمیٹی سے ملاقات ہوئی ہے،جس میں ان کوانتخابات میں حصہ لینے کے لئے قائل کرنے کی کوشش کی ہے شاید اس کے بہتر نتائج برآمد ہوں۔ انہوں نے کہاکہ قبائلی علاقوں میں پولیٹیکل پارٹی ایکٹ رائج کرنے کی بات احتیاط سے کی جائے کیونکہ قبائلیوں کو اعتماد میں لئے بغیر ان پر کوئی فیصلہ زبردستی نہیں ٹھونسا جا سکتا۔ انہوں نے کہاکہ نواز شریف کے کاغذات نامزدگی مسترد ہو چکے ہیں اب اگر وہ بائیکاٹ کرتے بھی ہیں تو ان کے بائیکاٹ سے یہ تاثر ثابت ہوگا کہ ان کا بائیکاٹ کاغذات نامزدگی مسترد ہونے کے خلاف ہے۔ انہوں نے کہاکہ متحدہ مجلس عمل قائم ہے اور ہمیشہ مشاورت کا راستے اختیار کریں گے ، انہوں نے کہاکہ تمام رہنماؤں کو ہر بات سوچ سمجھ کر کرنی چاہئے ۔جے یو آئی اکیلی نہیں ایم ایم اے میں شامل دیگر جماعتیں اتحاد چاہتی ہیں اس لئے ابھی تک واضح موقف اختیار نہیں کیا۔ ایک سوال کا جواب دیتے ہوئے انہوں نے کہاکہ بائیکاٹ کا فیصلہ متفقہ ہوتا تو موثر ہوتا۔