خرم شہزاد خرم

نجی ٹی وی چینل کا سابق وزیر اعظم پر توہین آمیز رویہ اختیار کرنے اور رپورٹنگ ٹیم کو حبسِ بے جا میں رکھنے کا الزام



اسلام آباد (نمائندہ جنگ) نجی ٹیلی وژن چینل نے سابق وزیراعظم میاں نواز شریف پر ایک انٹرویو کے دوران توہین آمیز رویہ اختیار کرنے اور رپورٹنگ ٹیم کو حبس بے جا میں رکھنے کا الزام عائد کیا ہے۔ یہاں ایک مقامی ہوٹل میں ٹی وی چینل بزنس پلس کے ڈائریکٹر نیوز رانا مبشر رحیم ڈائریکٹر کرنٹ افیرز جیسمین منظور اور بیورو چیف اسلام آباد صباء جمال نے میاں نواز شریف کے رویئے کیخلاف ایک پریس کانفرنس کی جس میں بتایا گیا کہ میاں نواز شریف نے انٹرویو کے دوران رپورٹنگ ٹیم کے سوالات پر غصہ میں آ کر توہین آمیز زبان استعمال کی۔ رپورٹنگ ٹیم سے انٹرویو کی ٹیپیں زبردستی چھین لی گئیں جس کے بعد حبس بے جا میں رکھ کر رپورٹنگ ٹیم سے اپنی مرضی کا دوبارہ انٹرویو کروایا گیا۔ ڈائریکٹر نیوز رانا مبشر رحیم نے کہا کہ 2جنوری کو بزنس پلس کی ٹیم انکی رہائشگاہ رائے ونڈ خصوصی انٹرویو کیلئے پہنچی۔ میاں نواز شریف سے خصوصی انٹرویو کا ٹائم انکے ایک ایڈوائزر شیراعظم نے طے کروایا تھا۔ ڈائریکٹر نیوز رانا مبشر نے کہا کہ میں نے میاں صاحب سے تین چار سوالات کئے جو کہ عام نوعیت کے سوالات تھے۔ ان سوالات پر میاں صاحب غصے میں آ گئے۔ رانا مبشر نے کہا کہ اس جواب کے وقت انہوں نے جو زبان استعمال کی وہ انتہائی توہین آمیز ہے اور ناقابل بیان ہے۔ دریں اثناء متحدہ قومی موومنٹ کے پریس ریلیز کے مطابق ایم کیو ایم کے قائد الطاف حسین نے کہا ہے کہ نجی ٹی وی چینل کے ڈائریکٹر نیوز اور دیگر عملے کے ساتھ میاں نواز شریف اور پرویز رشید کا غیر مناسب سلوک قابل مذمت ہے، واقعہ کا فوری نوٹس لیا جائے اور نواز شریف اور پرویز رشید کیخلاف ٹی وی ٹیپ چھیننے کا مقدمہ درج کیا جائے۔ انہوں نے کہا کہ نواز شریف اور مسلم لیگی رہنماؤں کا اگر آج میڈیا کے ساتھ یہ رویہ ہے تو یہ اقتدار میں آکر کیا کریں گے۔ انہوں نے ٹی وی چینل کے عملے کے ساتھ اپنی دلی ہمدردیوں کا اظہار کیا۔