عبدالقدوس

نادید ہ طاقتیں سازش کر رہی ہیں،صدر کو نہ ہٹاسکے تو دونوں اتحاد ی لانڈ ھی جیل میں ہو نگے،زرداری
لاڑکانہ (بیورو رپورٹ) پی پی پی کے شریک چیئرمین آصف علی زرداری نے کہا ہے کہ میاں نواز شریف اور ہمارے سفر کو اگر کامیابی حاصل ہو گئی تو صدر کی جگہ جلد خالی ہوجائے گی ورنہ ہم دونوں لانڈھی جیل میں ہونگے اور ہم اب جیل جانا نہیں چاہتے۔ وہ ہفتے کو نوڈیرو ہاؤس میں محترمہ بے نظیر بھٹو کی 55 ویں سالگرہ کے موقع پر خون کا عطیہ دینے کے بعد پریس کانفرنس سے خطاب کرتے ہوئے انہوں نے کہا کہ پیپلز پارٹی نے فیصلہ کیا ہے کہ جس طرح شہید محترمہ بے نظیر بھٹو کے نام پر ایک کارکن یوسف رضا گیلانی کو وزیراعظم بنایا ہے اس طرح بہت جلد پارٹی ایک ورکر کو بلا کر ملک کی صدر بنائے گی انہوں نے کہا کہ شہیدوں کی راہ پر چلنے والے ہمیشہ زندہ رہتے ہیں ہم قتل نہیں ہوئے بلکہ شہید ہوئے ہیں اور امر بن جاتے ہیں جبکہ پارٹی مخالف زندہ رہنے کے باوجود مرے ہووؤں میں شمار ہوتے ہیں سالگرہ کے موقع پر اپنا لہو دیکر شہید ذوالفقار علی بھٹو اور شہید بے نظیر بھٹو کے فلسفے کی یاد تازہ کر دی ہے ان کی شہادت ہمارے لئے مشعل راہ ہے اور ہم ان سے رہنمائی حاصل کر رہے ہیں تاکہ آئندہ نسلیں یہ لکھیں کہ ان کے بیٹوں اور بیٹیوں نے لہو دیکر ثابت کر دیا ہے کہ یہ بازی خون کی بازی ہے اور ہر گھر سے بھٹو نکلیں گے آج بھی مچھر کالونی کراچی، لاڑکانہ، کشمیر، وانا اور نوڈیرو کا بھٹو زندہ ہے ہم مر کر بھی زندہ ہیں۔ انہوں نے کہا کہ ہم شہید بے نظیر بھٹو کے ضلع لاڑکانہ اور نوڈیرو کو بھی مثالی ضلع اور علاقہ بنائیں گے۔ یہ عمل دوسرے ضلعوں کیلئے بھی جاری رکھا جائے گا۔ انہوں نے ایک سوال کے جواب میں کہا کہ میاں نواز شریف سے مذاکرات نہیں بلکہ ان سے ریلیشن شپ ہے اور یہ مزید بڑھ رہی ہے اور آگے چل کر یہ بھی ہو سکتا ہے کہ میں لاہور میں گورنر ہاؤس میں قیام کرنے کے بجائے ان کے گھر ہی رہائش اختیار کروں انہوں نے کہا کہ وہ اس وقت یہ نہیں بتا سکتے کہ پرویز مشرف کس طرح جا رہے ہیں وقت آنے پر خود پتہ چل جائے گا۔ آصف زرداری نے کہا کہ محترمہ بے نظیر بھٹو کی شہادت کے موقع پر میں نے پاکستان چاہئے کا نعرہ محترمہ بے نظیر بھٹو کی خواہش کے مطابق لگایا تھا کیونکہ وہ پاکستان کی حامی تھیں اور اسی کے لئے اپنی جان قربان کر دی۔

__________________