عبدالقدوس

لاہور (نمائندہ جنگ) میڈیا پر پابندیوں کے خلاف لاہور پریس کلب میں لگائے گئے ہڑتالی کیمپ میں شریک صحافیوں سے خطاب کرتے ہوئے سی پی این ای کے صدر عارف نظامی نے کہا کہ آزادی صحافت جس طرح ہم سے چھیننے کی کوشش کی جا رہی ہے، اسے ہم اپنی مشترکہ کوششوں سے ناکام بنا دیں گے۔ انہوں نے کہا کہ صدر مشرف دعویٰ کرتے ہیں کہ انہوں نے میڈیا کو آزاد کیا مگر میڈیا کی آزادی ہمیں مفت نہیں ملی بلکہ ہم نے یہ جدوجہد سے حاصل کی ہے۔ انہوں نے کہا کہ پیمرا آرڈیننس کے علاوہ بدنام زمانہ پریس اینڈ پبلی کیشن آرڈیننس کی بھی تشکیل نو کی کوشش کی گئی ہے جو قابل مذمت ہے، جیو کی بندش اور جس طرح جنگ گروپ کو اشتہارات سے محروم کیا گیا اس کی بھی مذمت کرتے ہیں کیونکہ اس طرح آپ ایک اخبار کو مالی مار دینا چاہتے ہیں تاکہ وہ گھٹنے ٹیک دے۔ انہوں نے کہا کہ اس کے علاوہ حکومت کی طرف سے یہ فرمائش بھی کی جا رہی ہے کہ فلاں جرنلسٹ کو فلاں ادارے سے فارغ کردیا جائے۔ ہڑتالی کیمپ سے خطاب کرتے ہوئے مجیب الرحمان شامی نے کہا کہ محترم عارف نظامی نے ہم سب کے دل کی آواز بلند کی ہے۔ اس جدوجہد میں ہم آپ کے ساتھ ہیں اور ساتھ رہیں گے۔ انشاء اللہ آپ کسی مرحلے پر بھی ہمیں پیچھے نہیں پائیں گے۔

__________________