ابن جلال

میڈیا کو ذمہ دارانہ کردار ادا کرنا ہوگا، سیفما
آج ٹی وی رپورٹ
لاہور: میڈیا کی آزادی کے بغیر مضبوط جمہوریت کا تصور نہیں کیا جاسکتا ،لیکن صحت مند صحافت کے لئے میڈیا کو ذمہ دارانہ کردار ادا کرنا ہوگا۔یہ بات لاہور میں سیفما خواتین ونگ کے زیر اہتمام ہونے والی کانفرنس میں مقررین نے کہی۔ اس موقعے پر طاہرہ مظہر علی خان نے کہا کہ صحافی خواتین کو محنت اور لگن سے کام کرکے اپنی صلاحیتوں کو منوانا چاہیے۔

ڈاکٹر روبینہ سہگل کا کہنا تھا آزادی اظہار ہر شخص کا حق ہے لیکن اس کو استعمال کرتے ہوئے اس بات کا ضرور خیال رکھنا چاہیے کہ جو بات دیکھی ،سنی اور پڑھی جارہی ہے اس سے کسی کی دل آزاری یا تحقیر تو نہیں ہورہی۔انہوں نے تجویز دی کہ ابلاغ کے تمام ذرائع خود احتسابی کے عمل سے گزرنے کے لئے طریقہ کار وضع کریں۔سیفما کے جنرل سیکریٹری امتیاز عالم نے کہا کہ خواتین سے متعلق واقعات رپورٹ کرتے ہوئے میڈیا کو محتاط رویہ اپنانا چاہیے۔