عبدالقدوس

جدّہ (جنگ نیوز) مناسکِ حج کی ادائیگی کے بعد لاکھوں حجاج کرام کیوطن واپسی کا سلسلہ شروع ہو گیا ہے، سعودی عرب سے برّی راستوں سے آنے والے حجّاج حالہ عمار، بطحاء کے بارڈروں سے روانہ ہوئے جبکہ مدینہ منورہ کے امیر محمد بن عبدالعزیز انٹرنیشنل ائیرپورٹ کے حج ٹرمینل سے حجاج کی واپسی جاری ہے، 205 پاکستانی حاجیوں کا پہلا قافلہ پیر کی رات جدہ کے کنگ عبدالعزیز انٹرنیشنل ائیرپورٹ کے حج ٹرمینل سے کوئٹہ روانہ ہو گیا۔ پی آئی اے سعودی عرب کے جنرل مینجر کرنل (ر) طلعت عمر نے ایک نجی ٹی وی کو بتایا ہے کہ پی آئی اے نے اس سال پوسٹ حج آپریشن کے لئے پاکستان سے تین سو تجربہ کار عملہ بلایا ہے، مکہ مکرمہ اور مدینہ منورہ کے دفاتر 24 گھنٹے حجاج کی خدمات کے لئے کھلے رہیں گے۔ کرنل طلعت عمر نے واضح کیا ہے کہ روزانہ 12حج پروازوں کے ذریعے قومی اےئرلائن 1,34,000 پاکستانی حجاج کو وطن واپس پہنچائے گی۔ انہوں نے کہا کہ پی آئی اے کی پرواز Pk-760 اور Pk-736 لاہور اور پشاور کے حجاج کو نارتھ ٹرمینل پر سے روانہ کیا جائے گا جبکہpk-732 اور Pk-742 کراچی اور اسلام آباد کے حجاج کی روانگی حج ٹرمینل سے ہو گی، خادم الحرمین شریفین نے ائیرپورٹ پر 4 نئے حج ٹرمینلز کھول دےئے ہیں، جنہیں ہر قسم کی سہولتوں سے آراستہ کیا گیا ہے، محکمہ پاسپورٹ کے 9 نئے کاؤنٹرز کھولے گئے ہیں اور 6 خارجی دروازے نصب کئے گئے ہیں، جس سے فی گھنٹے 1200حجاج کی سفری دستاویزات کلئیر ہو سکیں گی۔ محکمہ شہری ہوابازی کے حکام نے متنبہ کیا ہے کہ حجاج کی واپسی میں کسی بھی پرواز کی تاخیر پر 2 لاکھ ریال جرمانہ کیا جائے گا۔بحری جہازوں سے حجا ج کی واپسی بھی آج سے شروع ہو گئی ہے جنہیں مصر اور سوڈان پہنچایا جائے گا۔

__________________