خرم شہزاد خرم

اسلام آباد(جنگ نیوز) پاکستان نے منگل کو متحدہ عرب امارات کیساتھ پانچ ارب ڈالر مالیت کے تیل صاف کرنے کا کارخانہ لگانے کے معاہدے پر دستخط کر دیئے ہیں جس کی یومیہ گنجائش تین لاکھ بیرل ہو گی اور اس سے پاکستان میں اضافی 1.4 لاکھ ٹن پی او ایل ذخیرہ کرنے کی گنجائش پیدا ہو گی۔ وزیراعظم شوکت عزیز اور متحدہ عرب امارات کے وزیر توانائی جو کہ معاہدے پر دستخطوں کی تقریب میں موجود تھے نے اس معاہدے کو دونوں ممالک کیلئے تاریخ ساز اور دو طرفہ تعلقات کیلئے یادگار دن قرار دیا ہے۔ معاہدے کے تحت ابو ظبی کی انٹرنیشنل پٹرولیم انوسٹمنٹ کمپنی اور پاک عرب ریفائنری لمیٹڈ ضلع لسبیلہ میں حب کے قریب خلیفہ پوائنٹ پر خلیفہ کوسٹل ریفائنری پروجیکٹ قائم کریں گی۔ یہ منصوبہ دسمبر 2012ء میں مکمل ہو گا۔ وزیراعظم ہاؤس میں ہونے والی تقریب کے دوران معاہدے پر پٹرولیم اور قدرتی وسائل کے سیکرٹری فرخ قیوم اور آئی پی آئی سی کے منیجنگ ڈائریکٹر خادم القبیسی نے دستخط کئے۔ وزیراعظم شوکت عزیز نے تقریب سے خطاب کرتے ہوئے کہا کہ یہ پاکستان کی تاریخ میں سب سے بڑی براہ راست غیر ملکی سرمایہ کاری ہے اور اس ریفائنری سے ملک کی آئندہ ضروریات پوری ہونگی۔

__________________