خرم شہزاد خرم

ملکی امور میں فوجی کردار کا حامی نہیں“جنرل(ر) توقیر ضیاء پیپلز پارٹی میں شامل



لاہور (نمائندہ جنگ ) جنرل (ر) توقیر ضیاء کی شکل میں پیپلز پارٹی میں ایک طویل عرصہ کے بعد کسی اہم سابق جرنیل کی شمولیت ہوئی ہے جس پر پارٹی میں مختلف آراء سامنے آرہی ہیں۔ جنرل (ر) توقیر ضیاء کا صدر پرویز مشرف کے قریبی دوستوں میں شمار ہوتا رہا ہے، انہوں نے ریٹائرمنٹ کے بعد پارٹی میں شمولیت کیلئے رابطے کئے۔ ذرائع کے مطابق اس دوران ان کی چیئرپرسن بے نظیر بھٹو سے بھی بات ہوئی لیکن پھر معاملات التواء کا شکار ہوگئے تاہم گزشتہ دنوں اس سلسلہ میں پھر سرگرمیاں شروع ہوئیں۔ پارٹی کے رہنما منیر احمد خان نے ان کی پارٹی میں شمولیت کیلئے اہم کردار ادا کیا۔ چیئرپرسن بینظیر بھٹو نے منیراحمد خان کو یہ معاملہ دیکھنے کی ہدایت کی۔ ان کے رابطوں کے بعد چیئرپرسن کی ہدایت پر گزشتہ روز مخدوم امین فہیم خصوصی طور پر جنرل توقیر ضیاء کو پارٹی جوائن کرانے کیلئے لاہور آئے۔ دوسری طرف پارٹی کے اندر جنرل توقیر ضیاء کو آنے والے دنوں میں اتنے آسان حالات نہیں ملیں گے۔ وہ این اے 127 کے لئے پارٹی ٹکٹ کے بھی امیدوار ہیں لیکن اس کیلئے ابھی انہیں کوئی یقین دہانی نہیں کرائی گئی کیونکہ ان کے ٹکٹ کی راہ میں کئی اہم پارٹی رہنماؤں کی عدم رضامندی حائل ہے۔ مرکزی سیکرٹری جنرل کے بیٹے علی بدر اس حلقے میں صوبائی سیٹ پر امیدوار ہیں اور جہانگیر بدر سمجھتے ہیں کہ ان کے بیٹے کیلئے این اے 127 میں ڈاکٹر ریاض ہی موزوں امیدوار ہیں کہ ان کے خاندان اور حلقے کے ووٹ ان کے بیٹے کو مل سکتے ہیں۔ وہ بھی پریس کانفرنس میں موجود تھے۔ اسی طرح صوبائی تنظیم بھی اس حوالے سے زیادہ دلچسپی نہیں لے رہی۔ یہی وجہ ہے کہ گزشتہ روز کی پریس کانفرنس میں صوبائی تنظیم کا کوئی عہدیدار موجود نہ تھا۔ توقیر ضیاء کے دوسرے بھائی خواجہ طاہر ضیاء این اے 120 سے جہانگیر بدر کے مقابلے میں مسلم لیگ ق کے ٹکٹ پر الیکشن بھی لڑ رہے ہیں۔ تاہم جنرل توقیر ضیاء ٹکٹ کے حوالے سے بڑے واضح ہیں ان کا کہنا ہے کہ وہ فقط کارکن کے طورپر پارٹی میں شریک ہوئے ہیں۔ پریس کانفرنس میں وہ این اے 127 کے امیدوار ڈاکٹر ریاض کے پاس چل کر گئے اور انہیں کہا کہ میں کب آپ کی انتخابی مہم میں آؤں۔ ادھر پارٹی ذرائع کا یہ بھی کہنا ہے کہ بالاآخر اس حلقے سے ٹکٹ جنرل توقیر ضیاء کو ہی ملے گا۔