عبدالقدوس

اسلام آباد(رپورٹ…عمر چیمہ) معزول کئے جانے والے چیف جسٹس افتخار محمد چوہدری کو فراہم کئے گئے ذاتی محافظوں میں سے اس گارڈ کو گرفتارکر لیا گیا ہے جس نے چیف جسٹس کے ساتھ رہنے پر اصرار کیا تھا ۔انہیں چیف جسٹس سے وفاداری دکھانے پر بطور سز ا گرفتار کیا گیا ہے جبکہ دیگر گارڈز کو واپس بلالیا گیا۔ جسٹس سردار محمد رضا خان کی بہو کو بھی ججز انکلیو میں داخل ہونے کی اجازت نہیں دی گئی۔ ابتدائی طور پر جسٹس بھگوان داس اور جسٹس جاویداقبال سمیت کئی ججز کو ادویات کی فراہمی سے انکار کر دیا گیا۔ بعدازاں ڈاکٹر فقیر محمد نے انکے لئے ادویات اور ڈاکٹر کا بندوبست کیا۔معزول کئے جانے والے چیف جسٹس آف پاکستان جناب جسٹس چوہدری افتخار کی صاحبزادی نے برٹش کونسل میں اپنا امتحان اپنے گھر ججز انکلیو سے دیا ہے کیونکہ انہیں گھر سے نکل کر امتحانی مرکز جانے کی اجازت نہیں دی گئی۔ خاندانی ذرائع کے مطابق برٹش کونسل نے انہیں یہ خصوصی اجازت اس لئے دی کیونکہ چیف جسٹس کا پورا کنبہ اپنے گھر پر نظر بند ہے ۔ یہ معزول کئے جانے والے چیف جسٹس آف پاکستان کیلئے احترام کا ایک اظہار بھی ہے۔اتفاق کی بات ہے کہ رواں برس کے دوران ہی پچھلی مرتبہ جب افراء چوہدری کے امتحانات ہورہے تھے، اسی وقت چیف جسٹس کو غیر فعال کیا گیا تھا۔جبکہ اس مرتبہ ان کے والد کو ماورائے آئین اقدام کرکے برطرف کرنے کا حکمنامہ جاری کیا گیا ہے۔ افراء چوہدری بحریہ کالج کی طالبہ ہیں اور اگرچہ انہوں نے اے لیول کررکھا ہے تاہم وہ اپنے نمبر بہتر بنانے کیلئے دوبارہ امتحان میں شرکت کر رہی ہیں ، اس بہادر لڑکی نے اس وقت اپنا نقش ثبت کیا جب اس نے اپنے دوستوں کے ہمراہ پارلیمنٹ کے سامنے اپنے والدکی معطلی کے خلاف احتجاجی مظاہرہ کیا۔اس کے بعدافراء کو ان کے گھر میں محدود کر دیا گیا اور انہیں اپنی کلاسز میں حاضر نہیں ہونے دیا گیا تھا۔ چیف جسٹس کے اہل خانہ کو اسی ایک سال میں دوسری مرتبہ غیر قانونی طور پرنظر بندی کا سامنا ہے۔چیف جسٹس کا سب سے چھوٹا بیٹا جسے پیار سے ” بابا“ کہا جاتا ہے، وہ بیمار ہے لیکن اسے دوا دینے میں مدد دینے کیلئے کوئی نہیں ہے، اسی طرح خوراک کی رسد بھی ایک معاملہ ہے۔

__________________