عبدالقدوس

معاشرے کی فلاح تعلیماتِ رسول واہل بیت سے ہی ممکن ہے‘ عون نقوی
کراچی (پ ر) آل پاکستان ادارہ محفل حسینی اور ادارہ کی خواتین شاخ کے تحت نارتھ کراچی میں ”تحفظ رسول واہل بیت اور عصر حاضر کے تقاضے“ کے موضوع پر سیمینار سے علامہ سید محمد عون نقوی نے کہا کہ اہل بیت رسول کی قربانی نے اسلام کو قیامت تک کے لئے حیاتِ جاویداں بخشی آج امت کے زوال اور رسوائی کی وجہ تعلیماتِ اہل بیت سے دوری کا نتیجہ ہے آج کی کرب وابتلا میں گرفتار دنیا کو اہل بیت کی سیرت پر چلتے ہوئے معاشرے میں موجود برائیوں کے خلاف جہاد کرنا ہو گا۔ علامہ سید فرقان حیدر عابدی نے کہا عالم اسلام اسوہٴ رسول اور اہلبیت کی سیرت پر عمل کر کے ہی فلاح وکامرانی سے ہمکنار ہو سکتاہے۔ اہل بیت کی سیرت اور کردار ایک ایسا روشن چراغ ہے جس سے دنیا بھر کے مظلوم فیض حاصل کرتے رہیں گے۔ انہوں نے کہا کہ معاشرے کی فلاح کا راز اتباع رسول واہل بیت میں مضمر ہے جنہوں نے انسان کو ذلت کی زندگی سے عزت سے مرنے کا سلیقہ سکھایا ادارے کے مرکزی چیئرمین سید عالم زیدی نے کہا کہ سیرت اہل بیت پر ثابت قدم رہنے اور ظلم اور بربریت کے خلاف ڈٹ جانے ہی میں امّت مسلمہ کی فلاح کا راز مضمر ہے جن کی لازوال قربانی انسنایت کے لئے مشعل راہ ہے۔ انہوں نے کہا کہ لسانیت‘ انتہا پسندی‘ فرقہ واریت‘ دہشت گردی کی موجودہ صورتحال کا ملک متحمل نہیں ہو سکتا انہوں نے کہا کہ غریبوں کے چولہے ٹھنڈے ہو گئے روٹی‘ کپڑا‘ مکان‘ بیروزگاری‘ مہنگائی کے طوفان نے عوام کی زندگی اجیرن بنادی ہے ایسے میں عوام کو مہنگائی بیروزگاری‘ بجلی کی لوڈشیڈنگ پانی کی عدم فراہمی اشیائے خوردونوش کی آسانی سے فراہمی کی بجائے عوام کو ججز کی بحالی لانگ مارچ کے چکر میں لگا کر بنیادی سہولتوں سے توجہ ہٹا کر مفاد پرستی کی سیاست کی جارہی ہے جو کہ لمحہ فکریہ ہے۔ آغا آفتاب جعفری نے کہا کہ معاشرے میں موجود خرابیوں کا خاتمہ صرف تعلیمات محمد وآل محمد کی سیرت وکردار پر سختی سے عمل پیرا ہونے میں مضمر ہے پروفیسر سیدہ معروفہ عالم زیدی‘ سیدہ شگفتہ رضوی‘ سیدہ نوشابہ مظاہر‘ سیدہ وفا عابدی‘ سیدہ سبیکا عمار‘ سیدہ ابیحہ زیدی‘ سید ناصر زیدی‘ ظفر عباس ظفر‘ سید سہیل شاہ‘ سیدہ شیبا سیدین‘ سید فرذوق زیدی‘ سید شبر رضوی‘ سید عمران رضوی ودیگر نے محمد وآل محمد کو زبردست خراج عقیدت پیش کرتے ہوئے کہا کہ آئیے آج عہد کریں کہ عوام میں محبت‘ اخوّت‘ رواداری کو فروغ دینگے اور مذہبی منافرت کی بنیاد پر تقسیم کرنے والوں اور ملک کے خلاف کام کرنے والوں کا محاسبہ کریں گے۔

__________________