محمدعدنان

امریکی صدر براک اوباما نے کہا ہے کہ مسلمانوں کی اکثریت القاعدہ کو مسترد کرتی ہے لیکن یہ بھی حقیقت ہے کہ القاعدہ دنیا بھر سے ایسے لوگوں کو بھرتی کر رہی ہے جن کا نام ماضی میں شدت پسندی سے جڑا ہوا نہیں ہے۔

اپنے قومی خطاب میں صدر اوباما نے کہا ہے کہ مسلمانوں سے گفت و شنید کرنا انتہائی اہم ہے۔

صدر براک اوباما نے امریکی خفیہ اداروں کو حکم دیا کہ وہ شدت پسندی سے متعلق ملنے والی ہر معلومات پر کارروائی کریں اور کسی کو مخصوص ذمہ داری سونپیں تاکہ انٹیلیجنس کی ناکامی کی وجہ سے پھر کوئی حملہ نہ ہو سکے۔ انہوں نے یہ بھی کہا کہ کرسمس کے دن امریکی طیارے پر ہونے والے ناکام بم حملے سے متعلق انٹیلیجنس کے اہلکاروں کے پاس کافی معلومات تھی لیکن وہ اس کا بر وقت تجزیہ اور کارروائی کرنے میں ناکام رہے۔

صدر اوباما لگاتار تین دنوں سے ملک کی خفیہ ایجنسیوں پر تنقید کر رہے ہیں اور انہوں نے حکم دیا ہے ان ایجنسیوں کے کام کرنے کے طریقے کا پوری طرح سے جائزہ لیا جائے۔
براک اوباما نے کہا کہ انہوں نے واچ لسٹ کو مضبوط بنانے اور اس میں مزید مشکوک افراد کے نام شامل کرنے کا حکم دیا ہے۔ ان کا کہنا تھا کہ شدت پسند حملوں کے بارے میں جو بھی معلومات میسر ہو اس فوری طور پر وسیع پیمانے پر اداروں تک پہنچایا جائے اور اس کے تجزیے کرنے کے نظام کو بہتر بنایا جائے۔

انہوں نے کہا کہ کرسمس کے دن ہونے والا ناکام حملہ ایک شخص کی ناکامی نہیں تھی بلکہ ایک نظام کی ناکامی تھی کیونکہ شدت پسند کے بارے میں معلومات نظام میں موجود تھی لیکن اس کو دوسرے اداروں تک پہنچایا نہیں گیا تھا۔ براک اوباما نے کہا کہ گزشتہ دو ہفتوں میں ایک مرتبہ پھر یہ یاد دلایا گیا ہے کہ امریکہ کے سامنے کس طرح کے چیلنج ہیں اور کس دشمن کا سامنا ہے جو معصوم لوگوں کو مارنے پر تلا ہواہے۔

کرسمس کے دن ایک نائجیرین شہری عمر فاروق عبدالمطلب نے ایمسٹرڈم سے امریکی شہر ڈیٹرائیٹ آتی ہوئی ایک پرواز پر بم دھماکہ کرنے کی کوشش کی لیکن بم پھٹ نہ سکا اور مسافروں نے حملہ آور کو پکڑ لیا۔
بعد میں یہ معلومات سامنے آئیں کہ عبدالمطلب کا نام امریکی انٹیلیجنس کی واچ لسٹ پر تھا لیکن اس کا نام ایسے لوگوں کی اس فہرست پر نہیں ڈالا گیا تھا جنہیں امریکہ کے لیے ہوائی سفر کرنے کی اجازت نہیں۔ اس امریکی ’نو فلائی لسٹ‘ میں لگ بھگ ساڑھے پانچ لاکھ لوگوں کے نام درج ہیں۔

اس موقع پر امریکی حکام نے وہ خفیہ معلومات بھی جاری کیں جو ان عبدالمطلب سے متعلق ان کے پاس موجود تھی اور جس سے واضح ہوتا ہے کہ ان پر سی آئی اے کی نظر تھی۔

براک اوباما کے خطاب کے بعد، امریکہ کی ہوم لینڈ سکورٹی کی وزیر جینیٹ نیپولیتانو نے میڈیا کو بتایا کے وہ اس مہینے کے آخر میں سپین جا رہی ہیں جہاں وہ دنیا کے وزرا اور اہلکاروں سے ملاقات کریں گی جس میں فضائی سفر کو محفوظ بنانے کے لیےسخت اقدامات کرنے پر بات ہوگی۔ انہوں نے کہا کہ امریکہ اپنے ائرپورٹس پر باڈی سکرینگ مشینیں لگائےگا اور دوسرے ممالک پر زور دیا جائے کا کہ وہ اس طرح کی مشینیں لگائیں۔

__________________