چیتا چالباز

پاکستانی حکام نے کالعدم جماعت الدعوة کے مریدکے میں ایک بڑے مرکز کا انتظامی کنڑول سنبھال لیا ہے۔ یہ کارروائی اتوار کی صبح کی گئی اور صوبائی وزیر قانون ثناء اللہ نے وائس آف امریکہ کو بتایا کہ اس کا مقصد اس ادارے کی فلاحی سرگرمیوں کو روکنا نہیں بلکہ اس بات کو یقینی بنانا ہے کہ یہاں پر کسی قسم کی انتہا پسندانہ کارروائیاں نہ ہوں۔ان کا کہنا ہے کہ کالعدم تنظیم کے فلاحی ادارے کی سرگرمیوں کے لیے صوبائی حکومت نے ایک انتظامی سربراہ بھی مقرر کر دیا ہے جو فلاحی کام کرنے والے سٹاف پر گہری نظر رکھے گا۔صوبائی وزیر قانون کا کہنا ہے کہ جماعت الدعوة کے مرکزی دفتر کا کنٹرول سنبھالنے کا فیصلہ اقوام متحدہ کی سلامتی کونسل کی کمیٹی کے فیصلے کے تحت کیا گیا ہے۔

یاد رہے کہ بھارتی حکام ممبئی میں ہونے والے حملوں کا ذمہ دار کالعدم لشکر طیبہ کو قرار دیتے ہیں اور اور ان کا الزام ہے کہ جماعت الدعوة اسی عسکریت پسند تنظیم کا تسلسل ہے۔ ممبئی حملوں کے بعد بھارت نے جماعت الدعوة کے خلاف کارروائی کرنے کے لیے پاکستان پر سفارتی دباؤ میں اضافہ کرنے کے سلسلے میں اقوام متحدہ کی سلامتی کونسل کی ایک خصوصی کمیٹی کے ذریعے جماعت الدعوة پر پابندی لگانے کی منظوری حاصل کی تھی جس کے بعد عالمی تنظیم کے رکن کی حیثیت سے پاکستانی حکومت نے جماعت الدعوة پر پابندی لگا دی اور اس کے درجنوں دفاتر، سکول اورطبی مراکز کو بند کر دیا گیا۔ اس کے علاوہ تنظیم کے کئی اہم رہنماؤں سمیت 100 سے زیادہ کارکنوں کو بھی حراست میں لے لیا گیا جن سے ممبئی حملوں کے بارے میں تفتیش کی جارہی ہے۔

بھارتی حکام نے بھی ممبئی حملوں کی معلومات پاکستان کو دے رکھیں ہیں اور حکام کاکہنا ہے کہ یہاں پر کی جانے والی تحقیقات میں ان معلومات کو استعمال کیا جا رہا ہے ۔ پاکستان نے اعلان کر رکھا ہے کہ وہ اپنی تحقیقات مکمل ہونے کے بعد اس کے نتائج سے بھار ت کو بھی آگاہ کرے گا۔


افضل رحمن
لاہور