عبدالقدوس

محنت کشوں کی فلاح و بہبود کے لیے اقدامات کیے جائیں گے، صوبائی وزیر محنت
کراچی (اسٹاف رپورٹر) صوبائی وزیر محنت امیر نواب نے کہا ہے کہ مزدوروں کو بھلائی اور ان کی بہتری کے لیے حکومت ہر ممکن کوشش کریگی ان کی سہولتوں کی فراہمی کے لیے نئے منصوبے بنائے جارہے ہیں تاکہ ان کو اور ان کی اولاد کا بہتر مستقبل بنایا جائے۔ اس کے علاوہ محکمہ لیبر کے جتنے بھی افسران و ملازمین مختلف جگہوں پر کام کرتے ہیں وہ ایک ہفتے کے اندر اپنی جگہ پر آجائیں ورنہ ان کے خلاف کارروائی کی جائے گی۔ ان خیالات کا اظہار انہوں نے اپنے دفتر میں محکمہ کی بریفنگ لیتے ہوئے کیا۔ انہوں نے کہاکہ گزشتہ دور حکومت کی اپنی پالیسی تھی ہماری اپنی پالیسی ہے۔ میں آپ کو یقین دلاتا ہوں کہ ہم سب مل کر ایک ٹیم کی حیثیت سے کام کریں گے محکمہ اور عوام کی بہتری کے لیے مل جل کر کام کریں گے سب سے بڑی ترجیحات میں ہماری کوشش ہوگی کہ مزدور کو اس کی محنت کا پورا حق ملے اور ان کو زندگی کی بنیادی سہولتیں دی جائیں۔ اس موقع پر ڈائریکٹر نے بریفنگ میں بتایا کہ سندھ میں مزدوروں کی بھلائی کے منصوبے سب سے زیادہ ہیں ان کے لیے حیدرآباد کوٹری میں 28 کالونیاں بنائی گئی ہیں جس میں ہزاروں کی تعداد میں مکان بنا کر دیے ہیں مزدور کی بیٹی کی شادی کے لیے پچاس ہزار روپے اور ان کے بچوں کی تعلیم دلوانے کے لیے اسکالر شپ ، مکان، دوران ملازمت وفات پانے والے مزدور کے لواحقین کو ڈھائی لاکھ روپے دیتے ہیں ویلفیئر بورڈ کے تحت مزدوروں میں 6300 سلائی مشین تقسیم کی گئی ہیں۔ اس موقع پر سیکرٹری محنت رسول بخش پھلھپوٹو نے بھی بریفنگ دی۔

__________________