ابو کاشان

کراچی(اسٹاف رپورٹر) وزیرداخلہ سندھ بریگیڈیئر (ر) اختر ضامن کی زیر صدارت محرم الحرام کے سلسلے میں سیکورٹی ودیگر انتظامات کے حوالے سے مختلف مکاتب فکر کے علمائے کرام اور نمائندگان کا اجلاس سینٹرل پولیس آفس کراچی میں منعقد ہوا ۔اجلاس میں سیکریٹری داخلہ سندھ بریگیڈیئر (ر) غلام محمد محترم ، سی سی پی او کراچی اظہر علی فاروقی، کراچی کے تینوں زونل ڈی آئی جی، ڈی آئی جی ٹریفک، کراچی کے تمام ٹاؤنز کے ایس پی، ٹریفک ایس پی زونل سٹی ڈسٹرکٹ گورنمنٹ، کراچی واٹر اینڈ سیوریج بورڈ، کے ای ایس سی اور دیگر متعلقہ اداروں کے نمائندے بھی موجود تھے۔ اس موقع پر نگران وزیرداخلہ نے کہا ہے کہ حکومت ، محرم الحرام کے دوران سیکورٹی کے سخت انتظامات کرے گی اس حوالے سے علمائے کرام اور اکابرین کی تجاویز کو خصوصی اہمیت دی جائے گی اور انشاء اللہ آپ کی معاونت سے محرم الحرام کی تمام عبادات پورے مذہبی تقدس اور تحفظ کے ساتھ تکمیل کو پہنچیں گی اور اس سلسلے میں تمام ادارے اپنے فرائض تندہی اور مستعدی سے انجام دیں گے۔ اجلاس میں سی سی پی او کراچی اظہر علی فاروقی نے محرم الحرام کے لئے سیکورٹی انتظامات سے آگاہ کیا اور بتایا کہ گذشتہ سال کی طرح تمامتر سیکورٹی انتظامات عمل میں لائے جائیں گے اورپولیس کو اس ضمن میں متعلقہ اداروں کی معاونت بھی حاصل ہے جبکہ ایام محرم میں روشنی ، صفائی ستھرائی، راستوں کی مرمت، ٹریفک کی روانی اور مجالس اور جلوس ہائے عزاء کی سیکورٹی کیلئے بھی نہایت مربوط انتظامات کئے جارہے ہیں۔ اجلاس میں علامہ عباس کمیلی، مولانا مرزا یوسف حسین، علامہ شاہ تراب الحق قادری ، حاجی حنیف طیب ، مولانا فرقان حیدر عابدی، چاچا وحید اور تمام مکاتب فکر کے علمائے کرام اور نمائندوں نے شرکت کی۔

طارق راحیل

بہت شکریہ۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔