عبدالقدوس

مانسہرہ :برطانوی این جی او کے دفتر پر فائرنگ اور دستی بم حملہ،4افراد ہلاک
مانسہرہ ،ڈیرہ بگٹی(جنگ نیوز)مانسہرہ میں امدادی سرگرمیوں میں مصروف ایک غیرسرکاری برطانوی تنظیم پلان انٹرنیشنل کے دفترپراندھادھندفائرنگ اوردستی بم کے حملے میں ایک خاتون اہلکار سمیت 4افرادہلاک اور10 زخمی ہوگئے جبکہ بلوچستان میں ریموٹ کنٹرول بم دھماکے اور بارودی سرنگ کے پھٹنے سے سیکیورٹی فورسزکے ایک جوان سمیت دوافراد جاں بحق اور8شدید زخمی ہوگئے۔ تفصیلات کے مطابق مانسہرہ میں امدادی سرگرمیوں میں مصروف این جی او پلان انٹرنیشنل کے دفتر پرپیر کی سہ پہر 5 سے 6 مسلح نقاب پوش داخل ہوئے جنہوں نے سب سے پہلے دفتر کے احاطہ میں کھڑی گاڑیوں کو آگ لگا دی اور ساتھ ہی اندھا دھند فائرنگ شروع کر دی جس کے نتیجہ میں رخسانہ نامی ایک خاتون جھلس گئی جبکہ ظہیر شاہ گولیاں لگنے سے ہلاک ہو گیا۔دیگر2 ہلاک شدگان کی نعشیں مکمل مسخ شدہ تھیں جن کی شناخت نہ ہو سکی۔پولیس کے مطابق مسلح حملہ میں 10سے زائد گاڑیوں کو شدیدنقصان پہنچاہے جبکہ واقعہ کی رپورٹ درج کرلی گئی ہے تاہم تاحال کسی بھی گروپ یا تنظیم نے واقعہ کی ذمہ داری قبول نہیں کی۔دریں اثناء بلوچستان کے علاقے ڈیرہ بگٹی سے15کلومیٹر دور سنگ سیلا کے مقام پر سیکیورٹی فورسز کی گاڑی کو ریموٹ کنٹرول بم سے نشانہ بنایا گیا جس کے نتیجے میں فورسز کا ایک جوان جاں بحق اور 7شدید زخمی ہو گئے۔ زخمیوں کو فوری طور پر سوئی ہسپتال پہنچا دیا گیا جہاں متعدد زخمیوں کی حالت تشویشناک بتائی گئی ہے۔علاوہ ازیں سوئی کے علاقے سے 15کلومیٹر دور پٹ فیڈ کے مقام پر بارودی سرنگ کے پھٹنے سے سڑک کے قریب کھڑی ایک موٹر سائیکل تباہ ہوگئی جس سے موٹرسائیکل سوار بچل بگٹی ہلاک اور ان کا ساتھی شدید زخمی ہوگیا۔

__________________