ابن جلال

غیرملکی د ہشت گرد کراچی پہنچ گئے ہیں ،الطاف حسین

لندن: متحدہ قومی موومنٹ کے قائد الطاف حسین نے کہا ہے کہ ایم کیوایم پاکستان کو طالبان،القاعدہ ،جہادیوں اورمذہبی انتہاپسندوں کا وطن نہیں بلکہ مذہبی رواداری پریقین رکھنے والا ایک لبرل اورڈیموکریٹک ملک بناناچاہتی ہے۔ انہوں نے کہاکہ اسلام کے نام پرپاکستان میں دہشت گردی کرنے والے تین سے چارلاکھ افغانی اور دیگر غیرملکی دہشت گرد جدیدوخودکاراسلحہ سمیت کراچی پہنچ گئے ہیں جوکراچی اور حیدرآ بادسمیت پورے سندھ پر قبضہ کرنا چاہتے ہیں۔

انہوں نےان خیالات کااظہارایم کیوایم جنوبی افریقہ یونٹ کے زیراہتمام جوہا نسبرگ میں اپنی پچپن ویں سالگرہ کی تقریب سے ٹیلیفونک خطاب کرتے ہوئے کیا۔ تقریب میں ایم کیوایم کے کارکنوں اورانکے اہل خانہ سمیت جوہانسبرگ،ڈربن اور پریٹوریا میں مقیم پاکستانیوں اور ایشیائی باشندوں نے بڑی تعداد نے شرکت کی ۔ اس کے علاوہ افریقن نیشنل کانگریس کے نمائندوں ، مقامی انتظامیہ کے حکام اور مقامی شہریوں کی بڑی تعداد نے بھی موجودتھی ۔ انہوں نے کہا کہ ایم کیوایم مذہبی اقلیتوں کے خلاف ہرقسم کے امتیازی سلوک کاخاتمہ چاہتی ہے اور ان کیلئے یکساں حقوق چاہتی ہے ۔ ان کی جماعت خواتین کوبھی زندگی کے ہرشعبہ میں مردوں کے مساوی حقوق دلاناچاہتی ہے ۔

انہوں نے کہاکہ ایم کیوایم ہرقسم کی دہشت گردی اورمذہبی انتہاپسندی کے خلاف ہے۔ انہوں نے خودکش حملوں کی شدیدمذمت کرتے ہوئے کہاکہ دہشت گردی اور طالبانائزیشن نے پورے ملک کواپنی لپیٹ میں لے رکھا ہے اوراب ان دہشت گردوں کارخ صوبہ سندھ کی طرف ہے۔ انہوں نے کہاکہ مسلح طالبان نے کراچی کو چاروں طرف سے گھیر لیا ہے ،یہ طالبان جدیدترین مہلک ہتھیاروں اورگولہ بارود سے پوری طرح لیس ہیں جبکہ کراچی کے عوام خالی ہاتھ ہیں ۔

انہوں نے کہاکہ ہم کسی سے لڑنانہیں چاہتے لیکن اگرکسی نے ہمارے علاقوں پرحملہ کیا تو مسلح حملہ آوروں سے اپنے گھروں،ماؤں، بہنوں،بیٹیوں اوربچوں کے تحفظ کیلئے ہم بھی اقوام متحدہ کے چارٹر اور شریعت کے تحت اپنا بھرپوردفاع کریں گے۔ الطاف حسین نے کہا کہ کراچی میں ایم کیوایم کے بہادرکارکنان اپنی جانیں ہتھیلی پررکھ کر راتوں کوجاگ جاگ کر اپنے علاقوں کے تحفظ کیلئے سرگرم ہیں۔انہوں نے حاظرین سے کہاکہ وہ علاقوں کے تحفظ کیلئے اپنی مددآپکے تحت حفاظتی بندوبست کرنے والے ساتھیوں کی مدد کیلئے عطیات دیں اوراپنے گھروالوں سے بھی کہیں کہ وہ بھی اپنے تحفظ کیلئے ضروربندوبست کریں۔


ادھر سندھ کی وزیر اطلاعات شازیہ مری نے نجی ٹی وی سے گفتگو کرتے ہوئے کہا ہے کہ ایسی کوئی اطلاعات نہیں ہیں کہ غیر ملکی دہشت گرد کراچی پہنچ گئے ہیں ۔

جبکہ کراچی میں‌جماعت اسلامی کے رہنماء معراج الہدیٰ صدیقی نے الطاف حسین کے اس بیان کو پروپیگنڈہ قرار دیتے ہوئے کہا کہ کراچی میں پہلے ہی سے ناجائز اسلحہ بڑی تعداد میں‌موجود ہے۔ الطاف حسین طالبان کی موجودگی کا پروپیگنڈہ کرکے شہریوں کو ناجائز اسلحہ خریدنے کا کہہ رہے ہیں جو شہر کا امن وامان تباہ کرنے کے مترادف ہے۔ انہوں نے اس پروپیگنڈے کی شدید مذمت کی ہے۔