وجدان

چاڈ کی ایک عدالت نے فرانسیسی خیراتی ادارے زوئے آرک کے چھ کارکنوں کو چاڈ سے ایک سو تین بچوں کو اغوا کرنے کے الزام میں آٹھ سال قید اور نو ملین ڈالر جرمانے کی سزا سنائی ہے۔
فرانس کے خیراتی ادارے کے چھ کارکنوں کواکتوبر میں اس وقت گرفتار کیا گیا تھا جب وہ ان بچوں کو فرانس لا رہے تھے۔خیراتی ادارے کے کارکنوں کا موقف تھا کہ یہ بچے دارفور کے علاقے کے جنگی یتیم ہیں۔

فرانس نے کہا ہے کہ وہ چاڈ کی حکومت سے درخواست کرے گا کہ وہ ان خیراتی ادارے کے کارکنوں کو اس کے حوالے کر دے اور وہ فرانسیسی جیلوں میں سزا کاٹیں گے۔

فرانس اور چاڈ کے درمیان ایک ایسا معاہدہ موجود ہے جس کے تحت کوئی ملک کسی مجرم کو اپنی جیل میں رکھنے کی درخواست کر سکتا ہے۔

خیراتی ادارے کا موقف ہے کہ اس کو مقامی لوگوں نےگمراہ کیا ہے اور وہ ان کو بتایا گیا کہ تمام بچے دارفور کے جنگی یتیم ہیں جبکہ وہ تمام بچے چاڈ کے رہنے والے تھے۔