خرم شہزاد خرم

عوام مخلص اور بے لوث قیادت کو منتخب کریں، حلیم صدیقی



کراچی (اسٹاف رپورٹر) کراچی امن پسند پینل حلقہ 250 قومی اسمبلی کے آزاد امیدوار کیپٹن حلیم احمد صدیقی نے کہا ہے کہ کسی بھی معاشرے میں امن کا قیام ناگزیر حیثیت کا حامل ہوتا ہے۔ وہ مرکزی الیکشن آفس ڈیفنس فیز Ii پر منعقدہ خواتین کے اجتماع سے خطاب کر رہے تھے۔ انہوں نے کہا کہ بد امنی تمام مسائل کی جڑ ہوتی ہے جس کے باعث بے روزگاری اور جرائم میں اضافہ ہوتا ہے لہٰذا امن پسند پینل کے پلیٹ فارم سے ہمارا منشور امن روزگار اور خوشحالی ہے۔ انہوں نے کہا کہ خوشحال پاکستان کا تصور امن کے بغیر ایک سراب کی مانند ہے جو محض حکمرانوں نے ذاتی خوشحالی کو تحفظ دینے کے لیے نعرے کی صورت میں متعارف کرایا ہے حالانکہ حقیقت اس سے قطعی مختلف ہے پورا ملک خانہ جنگی اور افراتفری کا شکار ہو چکا ہے ملکی سالمیت کا تقاضا ہے کہ مخلص اور بے لوث قیادت کو منتخب کیا جائے۔ ہزارہ رابطہ کونسل کے جنرل سیکرٹری نعیم اشرف درانی نے کہا کہ کیپٹن حلیم احمد صدیقی نے ماضی میں عوام کی بے لوث خدمت کی ہے لہٰذا ہزارہ برادری ان کی غیر مشروط حمایت کا اعلان کرتی ہے۔ کارنر میٹنگ سے اسماء خان، لبنیٰ خان اور آسیہ خان نے بھی خطاب کیا اور خواتین کی جانب سے مکمل حمایت کا یقین دلایا۔