خرم شہزاد خرم

اسلام آباد(رپورٹ… محمد احمد نورانی) سپریم کورٹ بار کے صدر اور ملک کے ممتاز قانون دان اعتزاز احسن نے اڈیالہ جیل سے جنگ کو بتایا ہے کہ وکلاء برادری تین نومبر کوہونے والے عدلیہ کے قتل پر کبھی سمجھوتہ نہیں کریگی۔ انہیں ان کی رہائش گاہ سے سنیچر کے سیاہ دن کو گرفتار کیا گیاتھا، جیل سے دی نیوز سے اپنے رابطے میں انہوں نے کہا ہے کہ انہیں میانوالی جیل شفٹ نہیں کیا گیا ۔ انہوں نے مزید کہا کہ حکومت وکلاء اور ججوں کو دوردراز کے علاقوں میں بھیجنے کی افواہیں پھیلا کر وکلاء برادری اور سول سوسائٹی کو دھمکانا چاہتی ہے۔ انہوں نے مزید کہا کہ اس سے کوئی فرق نہیں پڑتا کہ میں کہاں رہاہوں اور یہ کہ آیا میں جیل میں ہوں یا نہیں ، اصل معاملہ یہ ہے کہ مجھے اس آمر نے قید کیا ہے جو دومرتبہ آئین توڑ چکا ہے اور کئی مرتبہ عدلیہ کی تذلیل کر چکا ہے۔ انہوں نے کہا کہ جنرل مشرف کے کیمپ میں یہ بہت بڑی غلط فہمی پائی جاتی ہے کہ وہ ہزار ہاوکلاء ، سول سوسائٹی کے ارکان یا انہیں اذیتیں دیکر وہ غیر آئینی اقدام کے خلاف بڑی مزاحمتی تحریک سے بچ سکتے ہیں ۔وکلاء تو پہلے ہی سے احتجاج کر رہے ہیں اور آمریت کیخلاف لڑائی لڑ رہے ہیں اور ہم بھی جیل سے نکلنے کے بعد پہلے سے لڑتے ہوئے وکلاء کے ساتھ شامل ہوں جائیں گے اور عدلیہ کی بحالی کے حوالے سے اپنی مہم کو مزید تیز کریں گے۔انہوں نے مزید کہا کہ ہم قانون کی حکمرانی ، آئین کی بالادستی ، خود مختار عدلیہ اور آزاد میڈیا چاہتے ہیں اور اس کے لئے ہم اپنے خون کا آخری قطرہ تک بہا دیں گے۔ ہم 3 نومبر کو آئین کی خلاف ورز ی کرنے والوں کو قانون کے دائر ے میں لائیں گے انہوں نے مزید کہا کہ تنقید سے بچنے کیلئے جنرل مشرف نے غیر آئینی اقدام کرتے ہوئے نہ صرف نجی ٹی وی چینلز پر پابندی عائد کردی بلکہ بین الاقوامی ٹی وی چینلز پر بھی پابندی عائد کردی انہوں نے سوال کیا کہ کیا بین الاقوامی میڈیا بھی تصویر کا غلط رخ پیش کررہا تھا۔انہوں نے کہا کہ جسٹس افتخار محمد چوہدری ہی پاکستان کے حقیقی چیف جسٹس ہیں ، میں پوری قوم کے ہمراہ ان تمام ججوں کو سلامی پیش کرتاہوں جنہوں نے پی سی او کے تحت حلف اٹھانے سے انکار کیا ، انہوں نے مزید کہا کہ یہ بہت بڑے جج تھے اور یہ آج بھی سپریم کورٹ کے جج ہیں۔پوری قوم سپریم کورٹ کے ججوں کی بحالی کیلئے متحدہو گی کیونکہ اسے وہ جج قبول نہیں جنہوں نے پی سی او کے تحت حلف اٹھایا ہے ۔

__________________