ابن جلال

عافیہ صدیقی کی گرفتار ی جنیوا ویاناکنونشن اور انسانی حقوق کی کھلی خلاف ورزی ہے،ڈاکٹر فوزیہ صدیقی
کراچی (پاک ڈاٹ نیٹ) امریکا میں اسیر پاکستانی ڈاکٹر عافیہ صدیقی کی بہن ڈاکٹر فوزیہ صدیقی نے کہا کہ ڈاکٹر عافیہ صدیقی دہشت گرد نہیں بلکہ وہ دہشت گردی کا شکار ہوئی ہیں ، امریکہ میں ڈاکٹر عافیہ کو انصاف ملنے کی توقع نہیںہے، عافیہ صدیقی کی گرفتار ی جنیوا ویاناکنونشن اور انسانی حقوق کی کھلی خلاف ورزی ہے اور اگر حکومت سنجیدگی سے کوشش کرے تو عافیہ ایک دن میں پاکستان آسکتی ہیں ۔ ڈاکٹر عافیہ صدیقی کی ان کے وکلاءسے بھی ملاقات نہیںکی جا رہی ۔ وہ جمعہ کو اپنے بھانجے محمد احمد اور والدہ کے ہمراہ کراچی پہنچنے کے بعد میڈیا سے بات چیت کر رہی تھیں ۔ ڈاکٹر فوزیہ صدیقی نے کہا کہ ڈاکٹر عافیہ صدیقی پاکستانی شہری ہیں اور انہیں پاکستان واپس لایا جانا چاہیے ۔ انہوںنے کہا کہ میری بہن زندہ ہے اور ہم چاہتے ہیں کہ وہ ہمیں مل جائے ضرورت محسوس کرنے پر میں امریکا بھی جاﺅں گی ۔اس سوال پر کہ کیا آپ ڈاکٹر عافیہ کی رہائی سے متعلق حکومت کی جانب سے کےے گئے اقدامات سے مطمئن ہیں پر انہوں نے کہا کہ مشیر داخلہ اور حکومت کی جانب سے مجھے جو یقین دہانی کرائی گئی ہے اس سے کافی حد تک مطمین ہوں ۔انہوں نے کہا کہ18جولائی 2008 سے ڈاکٹر عافیہ صدیقی کی گرفتاری ظاہر کی گئی ہے جب کہ عملاً وہ پانچ سال پہلے سے قید ہیں ۔ بھانجہ ملنے پر بہت خوش ہیں اور چاہتی ہوں کہ باقی دو بچے بھی جلد ہمیں مل جائیں ۔ اس موقع پر میڈیا سے بات چیت کرتے ہوئے ڈاکٹر عافیہ صدیقی کی والدہ نے کہا کہ ڈاکٹر عافیہ صدیقی زخمی ہیں اور ان کے زخموں سے پیپ بہہ رہا ہے اللہ تعالی اولاد چھیننے کا غم کسی کو نہ دے ۔ نواسہ ملنے پر خوش ہوں ، ڈاکٹر عافیہ کا کسی دہشت گرد جماعت سے تعلق نہیں اور جو نام میڈیا پر میری بیٹی سے القاعدہ کے حوالے سے منسوب کےے جا رہے ہیں وہ خود میں نے میڈیا پر سنے ہیں ۔اس موقع پر ڈاکٹر عافیہ کے بیٹے محمد احمد نے کہا کہ میں پاکستان آ کر بہت اچھا اور خوشی محسوس کر رہا ہوں ۔