عبدالقدوس

ضمنی انتخابات کے شیڈول میں تبدیلی ، اب پولنگ 18 جون کو ہوگی
اسلام آباد (مانیٹرنگ سیل) الیکشن کمیشن نے ضمنی انتخابات کے شیڈول میں تبدیلی کر دی ہے اور اب پولنگ دو ہفتے کی تاخیر سے 18 جون کو ہوگی ۔ قبل ازیں پولنگ کی تاریخ 3 جون مقرر کی گئی تھی،سیکریٹری الیکشن کمیشن کنور دلشاد نے کہا ہے کہ پرانے شیڈول کے مطابق سیاسی جماعتوں کے امیدواروں کو ٹکٹجاری کرنے میں مشکلات کا سامنا تھا۔ نئے شیڈول کے مطابق اب کاغذات نامزدگی 15 اپریل سے 6 مئی تک جمع کرائے جا سکتے ہیں۔ 7 سے 13 مئی تک ان کاغذات کی جانچ پڑتال ہوگی۔ 17 مئی تک اپیلیں دائر کی جاسکیں گی۔ ان اپیلوں پر فیصلہ 24 مئی کو ہوگا۔ امیدوار 26 مئی تک اپنے کاغذات واپس لے سکیں گے اور اسی روز امیدواروں کی نظرثانی شدہ فہرست شائع ہوگی اور 18 جون کو قومی اسمبلی کی 8، پنجاب اسمبلی کی 17 ،سندھ کی تین، سرحد کی سات اور بلوچستان اسمبلی کی تین نشستوں پر پولنگ ہوگی۔ اسلام آباد سے آن لائن کے مطابق سیکرٹری الیکشن کمیشن کنور دلشاد نے ایک بیان میں کہا کہ قومی اور صوبائی اسمبلیوں کے اجلاس کے باعث سیاسی جماعتوں کے لئے ضمنی انتخابات میں اپنے امیدواروں کو ٹکٹ جاری کرنے کے لئے توجہ مرکوز رکھنے میں مشکلات کا سامنا تھا۔

__________________