چاچا کمال

پاکستان میں پولیس کے مطابق صوبہ سرحد کے شہر چارسدہ میں سابق وزیر داخلہ آفتاب احمد خان شیرپاؤ پر ایک خودکش حملے میں کم سے کم ’30 افراد‘ ہلاک ہوئے ہیں۔
تفصیلات ابھی واضح نہیں ہیں لیکن اطلاعات کے مطابق شیرپاؤ کو حملے میں نقصان نہیں ہوا۔ ہلاکتوں کی تعداد میں اضافے کا خدشہ ہے۔

اس حملے میں درجنوں افراد زخمی ہوئے ہیں اور انہیں طبی امداد کے لیے مقامی ہسپتالوں تک پہنچایا جارہا ہے۔

حملے کے وقت آفتاب شیرپاؤ پشاور سے چالیس کلومیٹر دور اپنے گھر کے قریب ایک مسجد میں میں لوگوں سے عید مِل رہے تھے۔ حملے کے وقت مسجد میں تقریباً ایک ہزار لوگ جمع تھے۔ اطلاعات کے مطابق یہ مسجد آفتاب شیرپاؤ کی رہائش گاہ کے احاطے کے اندر واقع ہے۔

ایک اور پولیس اہلکار محمد شریف ورک نے خبررساں ادارے اے ایف پی کو بتایا کہ خودکش بمبار ’لوگوں کے اندر تھا جو عید کی نماز پڑھ رہے تھے۔‘ جائے وقوع پر موجود چھبیس سالہ نوجوان شوکت علی نے بتایا کہ ’ہم نماز ادا کر رہے تھے کہ ایک بہت بڑا دھماکہ ہوا، جیسے ہماری کان کی چادر پھٹ گئی۔‘

آفتاب شیرپاؤ پر آٹھ ماہ میں یہ دوسرا حملہ ہے۔ وہ آئندہ ماہ کے انتخابات میں قومی اسمبلی کے امیدوار ہیں۔

بعض اطلاعات میں کہا گیا ہے کہ اس حملے میں بمبار نے خود کو اڑا دیا۔ پولیس افسر خالد خان نے خبررساں ادارے اے پی کو بتایا کہ آفتاب شیرپاؤ اور ان کے بیٹے اس حملے میں بچ گئے ہیں۔

بشکریہ بی بی سی