شہنشاہ اکبر اعظم کے مقبرہ کی اصل خوبصورتی کی بحالی کیلئے سروے

بھارتی محکمہ آثار قدیمہ نے عظیم مغل شہنشاہ اکبر اعظم کے مقبرہ کی اصل چمک دمک کی بحالی کیلئے سروے شروع کردیا۔ آگرہ کے قریب سکندرا میں واقع اکبر اعظم کا مقبرہ اس کے بیٹے شہنشاہ جہانگیر نے اپنے دور حکومت(1605-1627) میں ستون اور شہتیر کے اصول پر تعمیر کروایا تھا۔ چار صدیاں گزرنے کے باعث اکبر اعظم کے مقبرہ کی اصل چمک دمک ماند پڑ گئی تھی جس کی وجہ سے اس کی خوبصورتی اور کشش میں بھی کمی آگئی تھی چنانچہ بھارتی محکمہ آثار قدیمہ نے مقبرہ کو اپنا اصل حسن واپس دلانے کیلئے سروے شروع کردیا ہے جس کے بعد اس کی مرمت کیلئے اقدامات کئے جائیں گے۔ یاد رہے برصغیر پاک وہند میں مغل دور حکومت کے دوران حکمرانوں کی ذاتی دلچسپی کے باعث فن تعمیر نے انتہائی ترقی کی تھی اور مختلف علاقوں میںایسی شاندار عمارتیں تعمیر کروائی گئیں جو آج بھی شاہکار کی حیثیت رکھتی ہیں۔ آگرہ ہی میں تعمیر کیا گیا تاج محل آج بھی سیاحوں کیلئے ایک پرکشش مقام ہے۔