عبدالقدوس

اسلام آباد (جنگ نیوز) انتخابات میں حصہ لینے والی 48 سیاسی جماعتوں کو انتخابی نشانات آج الاٹ کیے جائیں گے۔ اس حوالے سے الیکشن کمیشن نے تمام سیاسی جماعتوں کے صدور‘ سیکرٹری جنرلز اور مرکزی عہدیداروں کی کل جماعتی کانفرنس الیکشن کمیشن سیکرٹریٹ میں طلب کی ہے۔ کانفرنس کی صدارت چیف الیکشن کمشنر جسٹس(ر) قاضی فاروق کریں گے۔ متحدہ مجلس عمل میں شامل چھ جماعتوں کے نمائندوں کو بھی بلایا گیا ہے کیونکہ جماعت اسلامی نے چھتری اور جے یو آئی (ف) نے کتاب کا نشان مانگا ہے حالانکہ گزشتہ انتخابات میں مجلس عمل نے ایک ہی انتخابی نشان کتاب پر انتخاب لڑا تھا۔ الیکشن کمیشن نے اس بار انتخابی نشانات کی جو فہرست جاری کی ہے اس میں سے لوٹا ‘ تلوار‘ مولی اور پھل خارج کر دیئے ہیں جبکہ اس بات کا قوی امکان ہے کہ پیپلزپارٹی پارلیمنٹیرین کو ان کا روایتی انتخابی نشان تیر‘ مسلم لیگ (ن) کو شیر اور مسلم لیگ (ق) کو سائیکل مل جائے گا۔ یاد رہے کہ الیکشن کمیشن نے مجموعی طور پر147 انتخابی نشانات کی فہرست جاری کی ہے۔ یہ نشانات انتخاب میں حصہ لینے والی 48 سیاسی جماعتوں کو الاٹ کیے جائیں گے جبکہ جو امیدوار آزاد حیثیت سے انتخاب لڑ رہے ہیں انہیں نشانات کی الاٹمنٹ 16دسمبرکو ہوگی۔ الیکشن کمیشن نے تمام سیاسی جماعتوں کو بذریعہ مراسلہ ہدایت کی ہے کہ وہ آج کی کانفرنس میں اپنے مرکزی نمائندوں کو بھیجیں کہ نشانات کی الاٹمنٹ آج ہی کر دی جائے گی۔

__________________