عبدالقدوس

سوات سے جنگجوؤں کا صفایاکر کے حکومت کی رٹ بحال کردی ، پا ک فوج
سوات(بیورو رپورٹ )پاک فوج کے شعبہ تعلقات عامہ کے ڈائریکٹر جنرل میجر جنرل اطہر عباس نے کہا ہے کہ سوات سے جنگجوؤں کا صفایاکر کے حکومت کی رٹ بحال کردی گئی ہے جبکہ سیکیورٹی فورسز نے سوات سے 2 جنگجوؤ ں کو گرفتاراور2 نے ہتھیار ڈال دیئے۔تفصیلات کے مطابق غیر ملکی میڈیاکے ہمراہ سوا ت کے دورے کے دوران سرکٹ ہاؤس سیدوشریف میں میجر جنرل اطہر عباس نے کہا کہ سوات میں عسکریت پسندوں کیخلاف آپریشن میں پاک فوج نے بہادری کا مظاہرہ کیا اور سوات سے ان کاصفایاکر دیا۔ انہوں نے کہا کہ سوات کے تمام علاقوں میں سیکورٹی فورسزنے کنٹرول سنبھال کر حکومت کی رٹ بحال کردی اور سول انتظامیہ معمول کے مطابق کام کررہی ہے۔ بعدازاں صحافیوں کو عسکریت پسندوں سے برآمدکیاجانیوالا اسلحہ بھی دکھایا گیا۔دریں اثناء ڈی جی آئی ایس پی آر اور ذرائع ابلاغ کے نمائندوں نے سوات میں ناجیا ٹاپ اوراُچھری سرکا دورہ کیا۔ سرکاری ترجمان کے مطابق انہوں نے فوجی جوانوں سے ملاقات کی اور مختلف مورچوں کا دورہ کیا۔ سرکاری ترجمان کے مطابق انہوں نے ضلع شانگلہ کا بھی دورہ کیاجبکہ فضائی جائزہ بھی لیا گیا۔علاوہ ازیں ضلع سوات کے علاقے خوازہ خیلہ میں سیکیورٹی فورسز نے 2مشتبہ جنگجوؤں کو گرفتارکرلیاجنہیں تفتیش کیلئے نامعلوم مقام پر منتقل کردیا گیا جبکہ تحصیل کبل سے تعلق رکھنے والے 2مشتبہ جنگجوؤں نے ہتھیار ڈال کر خودکو اسلحہ سمیت حکام کے حوالے کردیا۔

__________________