ابو کاشان

سندھ میں مسلم لیگ ق کی قیادت میں قائم سابق حکمران اتحاد نے کراچی میں چار نشستوں کے علاوہ تمام نشستوں پر ایم کیو ایم کی حمایت کا اعلان کیا ہے۔
سندھ میں پاکستان پیپلز پارٹی اور مسلم لیگ ن میں دس نشستوں پر سمجھوتے کے لیے مذاکرات جاری ہیں۔

کراچی میں منگل کی شام متحدہ قومی موومنٹ کی رابطہ کمیٹی کے ڈپٹی کنوینر ڈاکٹر فاروق ستار اور مسلم لیگ ق کے صوبائی صدر ارباب غلام رحیم نے ایک پریس کانفرنس کے ذریعے انتخابات کے لیے مشترکہ حکمت عملی کا اعلان کیا۔

ڈاکٹر فاروق ستار کا کہنا ہے کہ کراچی کی تمام نشستوں پر ایم کیو ایم انتخابات لڑ رہی ہے جن میں وہ تمام جماعتیں اس کی مدد کریں گی جن سے سمجھوتہ ہوا ہے۔ تاہم ایک قومی اور تین صوبائی نشستوں پر سمجھوتہ نہیں ہوسکا۔




انہوں نے بتایا کہ اندرون سندھ میں مسلم لیگ ق اور اس کی اتحادی جماعتیں ایم کیوایم کی تین قومی اور سات صوبائی نشستیں پر حمایت کر رہی ہیں جبکہ چار قومی اور دس صوبائی نشستوں پر ایڈجسٹمنٹ نہیں ہوسکی اور وہاں دونوں کے امیدوار انتخاب لڑیں گے۔

مسلم لیگ ق کے صوبائی صدر ارباب غلام رحیم کا کہنا تھا کہ مسلم لیگ ق، نیشنل پیپلز پارٹی، مسلم لیگ فنکشنل اندرون سندھ میں مل کر انتخابات لڑیں گی۔

ان کا کہنا تھا کہ تھا کہ حزب اختلاف کی جماعتیں کہتی تھیں کہ سندھ میں مسلم لیگ ق کا کوئی وجود نہیں ہے مگر انہوں نے سندھ بھر میں امیدوار کھڑے کرکے اس کے وجود کو ثابت کیا ہے۔

کراچی کے حلقے این اے دو سو پچاس پر مسلم لیگ نواز کے امیدوار سلیم ضیا پاکستان پیپلز پارٹی کے امیدوار مرزا اختیار بیگ کے حق میں دستبردار ہوگئے۔ اور صوبائی حلقے پی ایس 113 پر پاکستان پیپلز پارٹی کے امیدوار ذوالفقار قائمخانی مسلم لیگ ن کے امیدوار سلیم ضیا کے حق میں دستبردار ہوگئے ہیں۔

پاکستان پیپلزپارٹی کراچی کے صدر راشد ربانی کا کہنا ہے کہ ان کے جمعیت علمائے اسلام، عوامی نیشنل پارٹی، سنی تحریک اور جمعیت علمائے پاکستان سے مذاکرات جاری ہیں مگر ابھی تک کوئی کامیابی حاصل نہیں ہوئی ہے۔

ان کا کہنا تھا کہ قومی اسمبلی کی تین نشستوں این اے 249 ، 241 اور 253 پر ان جماعتوں کی خواہش ہے کہ ان کے امیدوار ہوں جبکہ پاکستان پیپلز پارٹی کے لیے یہ فصیلہ کرنا بہت مشکل ہے۔

مسلم لیگ نواز کے رہنما سلیم ضیا کا کہنا ہے کہ ان کے پاکستان پیپلز پارٹی کے علاوہ دیگر جماعتوں اور آزاد امیدواروں سے مذاکرات جاری ہیں آنے والے دو تین دنوں میں معاملات طئے ہوجائیں گے۔