خرم شہزاد خرم

ریاض (جنگ نیوز) جنرل پرویز مشرف ایمرجنسی کے نفاذ کے بعد اپنے پہلے بیرونی دورے پر منگل کو سعودی عرب پہنچے، جہاں انہوں نے سعودی رہنماؤں سے مذاکرات کئے ہیں اور مبینہ طور پر شاہ عبداللہ بن عبدالعزیز سے مطالبہ کیا ہے کہ وہ نواز شریف کو آزادانہ سرگرمیاں نہ کرنے دیں۔ اے پی کے مطابق جنرل پرویز نے سعودی عرب سے اپنے بڑے سیاسی حریف نواز شریف سے ملاقات کا اہتمام کرانے کیلئے مدد طلب کی ہے۔ سعودی حکام نے کہا ہے کہ وہ جنرل پرویز اور نواز شریف کے درمیان ملاقات کرانے کی کوششیں کر رہے ہیں تاہم اسلام آباد میں جنرل پرویز کے دفتر کے ایک اہلکار کا کہنا ہے کہ جنرل پرویز کا نواز شریف سے ملاقات کا کوئی منصوبہ نہیں ہے۔ اہلکار نے کہا کہ سعودی رہنما یہ چاہتے تھے کہ جنرل پرویز، نواز شریف کو واپس پاکستان آنے دیں اور عام انتخابات میں حصہ لینے کا موقع دیں لیکن جنرل پرویز سعودی عرب کو اس بات پر راضی کرنے کی کوشش کر رہے ہیں کہ نواز شریف پاکستان واپس نہیں آسکتے، کیونکہ اس سے سیاسی انتشار گہرا ہو گا اور ملکی استحکام کو خطرات لاحق ہوجائیں گے۔ اہلکار نے بتایا کہ جنرل پرویز نے نجی طور پر اپنے معاونین سے کہا ہے کہ وہ نواز شریف کو جنوری میں انتخابات کے بعد واپس آنے کی اجازت دینے کیلئے تیار ہیں لیکن اس کیلئے شرط یہ ہے کہ وہ اپنی تکرار کم کردیں۔ خبر رساں ادارے اے ایف پی نے پاکستان کے سفارتی ذرائع کے حوالے سے بتایا ہے کہ صدر پرویز مشرف چاہتے ہیں کہ سعودی عرب نواز شریف پر دباؤ ڈالے کہ وہ پاکستان میں کسی بھی طرح کی سیاسی سرگرمیوں میں حصہ نہ لیں جیسا کہ وہ پہلے کرتے رہے ہیں۔ نام ظاہر نہ کرنے کی شرط پر مذکورہ سفارتی ذریعے نے بتایا کہ ملاقات کے دوران جنرل پرویز مشرف نے سعودی حکام سے اپیل کی کہ شریف خاندان کو پاکستان جانے کی اجازت نہ دی جائے اور نواز شریف کی جانب سے بینظیر بھٹو کے ساتھ اتحاد بنانے کیلئے کی جانے والی کوششوں کو ناکام بنانے کی کوشش کی جائے کیونکہ ایسا کوئی اقدام انتخابات کے مقررہ وقت پر انعقاد میں رکاوٹ پیدا کرسکتا ہے۔ دوسری جانب نواز شریف نے اے ایف پی کو بتایا ہے کہ جنرل پرویز نے گزشتہ دو ماہ کے دوران تین بار ان سے رابطہ کیا تھا۔ لیکن انہوں نے کہا کہ فوجی حکمران سے ملاقات کا کوئی جواز نہیں ہے۔ صدر جنرل پرویز مشرف اور سعودی ولی عہد شہزادہ سلطان بن عبدالعزیز نے دہشتگردی و انتہا پسندی کے انسداد کیلئے مشترکہ اقدامات اٹھانے اور دونوں ممالک کے درمیان تمام شعبوں میں تعاون بڑھانے پر اتفاق کیا ہے۔ منگل کو یہاں ولی عہد کے دفتر میں ہونے والی ملاقات میں صدر پرویز اور شہزادہ سلطان نے سیکورٹی ایشوز اور علاقائی صورتحال سمیت باہمی تشویش کے مختلف امور پر تبادلہ خیال کیا۔ سعودی فرمانروا سے ملاقات کے دوران صدر پرویز نے کہا کہ پاکستان سعودی عرب کے ساتھ اپنے تعلقات کو بہت اہمیت دیتا ہے۔ تاریخی تعلقات نسل در نسل مزید مضبوط تر ہوئے ہیں۔ دونوں اطراف نے پاکستان اور سعودی عرب کے درمیان کثیر الجہتی برادرانہ تعلقات کو مزید مستحکم بنانے کے اپنے عزم کا اعادہ کیا۔ اسلام آباد سے صالح ظافر کے مطابق صدر پرویز آج عمرہ کی ادائیگی کے بعد اپنا دورہ مختصر کرکے پاکستان واپس آجائیں گے۔ صدر پرویز کی نواز شریف کے ساتھ ملاقات کا اہتمام نہ ہونے کے باعث اس حوالے سے کی جانے والی تمام قیاس آرائیاں دم توڑ گئیں۔ ذرائع کے مطابق نواز شریف نے اپنا سخت موقف برقرار رکھا اور صدر پرویز سے ملاقات سے انکار کردیا۔

__________________