چاچا کمال

سعودی سفارتخانے سے جاری ایک وضاحتی بیان میں کہا گیا ہے کہ سعودی سفیر کے معزول چیف جسٹس افتخار محمد چوہدری کی رہائش گاہ کے دورے کا مقصد ادائیگی حج کے لیے سعودی حکومت کی دعوت کے حوالہ سے ان کے پروگرام کا جائزہ لینا تھا۔
پاکستان میں سعودی سفیر علی عواض العسیری کے جسٹس افتخار محمد چوہدری کی رہائش گاہ کے دورہ کے حوالہ سے اخبارات میں شائع ہونے والی قیاس آرائی پر مبنی خبروں کی بیان میں سختی سے تردید کی گئی ہے۔

بیان کے مطابق سعودی حکومت نے جسٹس افتخار محمد چوہدری کو حج کی دعوت اس سال اگست میں دی تھی اور سفیر علی عواض العسیری محض یہ معلوم کرنے گئے تھے کہ کیا جسٹس چوہدری اب بھی عمرہ یا حج کی ادائیگی میں دلچسپی رکھتے ہیں۔

وضاحت میں یاد دلایا گیا کہ معزول چیف جسٹس نے گزشتہ سال بھی سعودی حکومت کی اسی طرح کی دعوت پر اپنے اہلخانہ کے ہمراہ حج ادا کیا تھا۔

بیان میں کہا گیا ہے کہ سابق چیف جسٹس کے لیے سعودی حکومت کی طرف سے پیشکش یا حکومت پاکستان کی طرف سے کوئی پیغام پہنچانے کے متعلق قیاس آرائیوں میں کوئی صداقت نہیں ہے۔

بیان میں ذرائع ابلاغ پر زور دیا گیا ہے کہ صداقت سے عاری اس طرح کی بے بنیاد خبروں کو شائع نہیں کیا جانا چاہیے کیونکہ بے بنیاد اور من گھڑت خبروں سے ایک برادر ملک، اس کی قیادت اور عوام کے متعلق منفی تاثر پھیلتا ہے۔

اسلام آباد میں غیرملکی سفیر گزشتہ کئی ہفتوں سے کافی سرگرم دکھائی دے رہے ہیں۔ سفارتی ماہرین کے مطابق سیاستدانوں سے یہ ملاقاتیں غیرمعمولی ہیں۔


بشکریہ بی بی سی