عبیداللہ عبید

سائنسدانوں نے ملک کو ایٹمی طاقت بنا کر قرآنی حکم پر عمل کیا: مفتی رفیع عثمانی

‏
کراچی (اسٹاف رپورٹر) مفتی اعظم پاکستان اور دارالعلوم کراچی کے صدر مفتی محمد رفیع عثمانی نے کہا ہے کہ پاکستانی قوم کے مثالی اتحاد و اتفاق نے بھارت کو دھمکیاں بند اور جارحانہ رویّہ ختم کرنے پر مجبور کردیا اور مجھے اس بات کی خوشی ہے کہ پاکستانیوں میں اختلافات کبھی ملکی امن و سلامتی کی راہ میں حائل ہوئے اور نہ ہوں گے۔ مکہ مکرمہ سے ٹیلیفون پر ڈاکٹر عامر لیاقت حسین سے گفتگو کرتے ہوئے مفتی رفیع عثمانی نے کہا کہ ہمارے درمیان تفرقہ اور انتشار اپنی جگہ ہے، تاہم پوری قوم دشمن کے خلاف متحد اور سیسہ پلائی ہوئی دیوار بنی ہوئی ہے۔ انہوں نے کہا کہ پاکستان کے حالات توجہ طلب بلکہ کسی حد تک تشویشناک بھی ہیں لیکن بھارت نے جس انداز میں پاکستان سے نمٹنا چاہا اور اس کے خلاف دھمکی آمیز طرز اپنایا، اس کا سب سے بڑا فائدہ علاقائی و طبقاتی گروہوں میں منقسم افراد اور مختلف تنظیموں سے تعلق رکھنے والے پاکستانیوں کے درمیان اتحاد و اتفاق کی صورت میں ابھر کر سامنے آیا۔ مفتی رفیع عثمانی نے مزید کہا کہ پاکستانی مضبوط قوم ہیں اور ہمارا ملک ایٹمی طاقت کا مالک اور عالم اسلام کا اہم حصہ ہے اور ہمیں اس بات پر فخر ہے کہ ہمارے سائنس دانوں نے ملک کو ایٹمی طاقت بنا کر قرآن کریم کے اس حکم پر عمل کیا جس کے تحت مسلمانان عالم کو دشمن کے خلاف حربی استعداد اور استطاعت حاصل کرنے کا حکم دیا گیا ہے۔ واضح رہے کہ مفتی رفیع عثمانی مکة المکرمہ میں رابطہ عالم اسلامی (مسلم ورلڈ لیگ) کے زیراہتمام ”فتویٰ اور اس کے قواعد و ضوابط“ کے موضوع پر عالمگیر کانفرنس میں شرکت کیلئے گئے ہوئے ہیں۔

ماخذ: روزنامہ جنگ، ہفتہ 28‏ فروری‏، 2009ء