ابن ضیاء

کراچی (پ ر) مہاجر قومی موومنٹ کے اسیر چیئرمین آفاق احمد نے ہجری سال نو کے آغاز پر جیل سے اپنے پیغام میں کہا ہے کہ یہ ماہ زمانہ قدیم سے حرمت والے مہینے کے طور پر جانا جاتا ہے اور زندہ قومیں نئے آغاز پر اپنے گزرے ہوئے ماضی پر نظر ڈال کر اور حاصل تجربات سے فائدہ اٹھا کر نئے عزم اور حوصلے سے مستقبل کی پیش بندی کرتی ہیں لیکن ہمارے حکمران اس اصول اور قائدے سے فائدہ اٹھانے کا سوچتے تک نہیں، اسلامی سال کے آغاز ہی سے حکومت کی جانب سے سخت سیکیورٹی اور ریڈ الرٹ کے اقدامات اور ملک دشمن عناصر کی جانب سے مذہبی منافرت پھیلانے کی وجہ سے ہمارا معاشرہ سہما ہوا نظر آتا ہے۔ ملک کا امن و امان مکمل طور پر خود کش حملہ آوروں کے رحم و کرم پر ہے۔ انہوں نے عوام سے اپیل کی کہ وہ اسلامی تعلیمات کے مطابق مذہبی ہم آہنگی اور رواداری کو فروغ دیں اور اپنے اتحاد کے ذریعے ملک دشمن اور اسلامی دشمن عناصر کے مذموم مقاصد کو ناکام بنا دیں۔ انہوں نے لاہور میں خود کش دھماکے کی مذمت کرتے ہوئے ہلاک شدگان اور زخمیوں کے لواحقین سے ہمدردی کا اظہار کیا۔