عبدالقدوس

دہشتگردی کے خلاف جنگ میں پاکستان کا کردار قابل ستائش ہے،برطانوی آرمی چیف کی صدر پرویز سے ملاقات
راولپنڈی (جنگ نیوز) برطانوی فوج کے چیف آف جنرل اسٹاف جنرل سررچرڈ ڈینٹ نے پیرکوصدر پرویز مشرف سے یہاں ملاقات کی اورعالمی دہشت گردی کے خلاف جنگ میں پاکستان اور برطانیہ کی مسلح افواج کے درمیان شاندارتعاون کوسراہا۔ انہوں نے اس جنگ میں پاکستان کے کردار کو قابل ستائش قرار دیا۔ صدرپرویز مشرف نے پاکستان اوربرطانیہ کی مسلح افواج کے درمیان شاندار تعلقات کا ذکر کرتے ہوئے امید ظاہرکی کہ برطانوی چیف آف جنرل اسٹاف کے دورہ سے یہ تعلقات مزید مستحکم ہوں گے۔بعدازاں جنرل سررچرڈ ڈینٹ نے جنرل ہیڈکوارٹرزکا دورہ کیا اورچیف آف آرمی اسٹاف جنرل اشفاق پرویز کیانی سے ملاقات کی۔آئی ایس پی آرکے بیان کے مطابق جنرل رچرڈ ڈینٹ کچھ دیر آرمی چیف کے ہمراہ رہے اور پیشہ ورانہ دلچسپی کے امور خصوصاً خطے کی سلامتی کی صورتحال پر تبادلہ خیال کیا۔ اس سے قبل جنرل ہیڈکوارٹرز پہنچنے پرجنرل رچرڈ ڈینٹ کوپاک فوج کے ایک چاق وچوبند دستے نے گارڈ آف آنر پیش کیا۔دریں اثناء جنرل سررچرڈ ڈینٹ نے جوائنٹ اسٹاف ہیڈکوارٹرز میں جوائنٹ چیفس آف اسٹاف کمیٹی کے چیئرمین جنرل طارق مجید سے ملاقات کی اور دونوں ممالک کے درمیان مختلف شعبوں میں دوطرفہ فوجی تعاون بڑھانے سے متعلق معاملات پر تبادلہ خیال کیا۔ فریقین نے دونوں ممالک کی مسلح افواج کے درمیان جاری تعاون پر اطمینان کا اظہار کرتے ہوئے ان تعلقات کا دائرہ مزید بڑھانے سے اتفاق کیا۔ خطے میں دہشت گردی کے خلاف جنگ پر تبادلہ خیال کرتے ہوئے فریقین نے خیال ظاہرکیا کہ دہشت گردی سے پورے عزم کے ساتھ عالمی برادری کی اجتماعی کوششوں کے ذریعہ ہی موثر طور پر نمٹا جا سکتا ہے۔ جنرل طارق مجید نے کہا کہ ہماری کوششوں میں خاصی پیش رفت ہوئی ہے، ملک میں حالیہ پرامن انتخابات اور منتخب نمائندوں کو اقتدار کی منتقلی سے سول ملٹری تعلقات میں ہم آہنگی پیدا ہوگی اور انسداد دہشت گردی کی کوششوں میں معاونت کیلئے وسیع تر اتفاق رائے پیدا کرنے میں سہولت پیدا ہو گی۔ انہوں نے کہا کہ وقت کا تقاضا ہے کہ گڑ بڑ والے علاقوں میں سیاسی اور سماجی و اقتصادی ترقی کے ذریعہ دل جیتنے کی جامع حکمت عملی اختیار کی جائے۔ اس سے قبل جوائنٹ اسٹاف ہیڈکوارٹرز پہنچنے پرجوائنٹ اسٹاف ہیڈکوارٹرز کے ڈی جی آپریشنز اینڈ پلانز میجر جنرل بلال عمر نے جنرل رچرڈ ڈینٹ کا خیر مقدم کیا۔

__________________