پاکستانی

مسلم لیگ (ن)کے قائد اورسابق وزیراعظم میاں نواز شریف نے کہا ہے کہ اگر وہ دوبارہ اقتدار میں آگئے تو کارگل واقعہ کی تحقیقات کیلئے کمیشن تشکیل دیں گے، مشرف ملک کے قانون سے بالاتر نہیں ہوسکتے،کشمیرپاکستان اور بھارت کے درمیان اہم ایشو ہے،بے نظیر نے ہمارے ساتھ معاہدہ توڑ کر فوجی آمر سے کچھ لو ،کچھ دوکی بنیاد پر ڈیل کرلی ،دکھ ہوا۔ایک غیرملکی خبررساں ادارے سے بات چیت کرتے ہوئے نواز شریف نے کہاکہ 1999ء کے کارگل واقعہ کے پیجھے جنرل مشرف کا ہاتھ تھا اور انہیں اس واقعہ کے بارے میں کوئی علم نہیں تھا ۔دکھ کی بات تو یہ ہے کہ ایک فوجی جنرل نے پاکستان اور بھارت کے درمیان بڑھتے ہوئے خوشگوار تعلقات کے عمل کو توڑا لیکن اس کے خلاف کوئی ایکشن نہیں لیا گیا۔کارگل کے واقعہ کو پاک بھارت تعلقات کی تاریخ میں ہمیشہ یاد رکھا جائے گا ۔کاش یہ واقعہ پیش نہ آتا تو دونوں ممالک کے درمیان تعلقات میں مثبت پیش رفت ہورہی تھی۔نواز شریف نے کارگل واقعہ کے بعد سابق بھارتی وزیراعظم اٹل بہاری واجپائی کے اس بیان کو بھی افسوسناک قرار دیا جس میں انہوں نے کہا تھا کہ پاکستانی وزیراعظم نے مجھے مایوس کیا ہے ۔نواز شریف نے کہاکہ اٹل بہاری واجپائی کو یہ بیان دینے سے قبل یہ تو معلوم کرنا چاہیے تھا کہ انہیں مایوس کرنے والا کون ہے حالانکہ جس کارگل واقعہ کے پیش نظر انہوں نے یہ بیان دیا اس کے بارے میں مجھے تو کوئی علم ہی نہیں تھا۔ایک سوال پر کہ کیا جنرل پرویز مشرف بھی کمیشن کے سامنے جواب دہ ہوں گے نواز شریف نے کہا کہ ا س بات کا فیصلہ پینل کرے گا تاہم انہوں نے کہاکہ جنرل مشرف ملک کے قانون سے بالاتر تو نہیں ہوسکتے ۔اگر میں عدالت کے سامنے پیش ہوسکتا ہوں تو کوئی دوسرا کیوں نہیں ہوسکتا۔ صدر پرویز مشرف کے اس بیان پر کہ پاک بھارت تعلقات اضافہ ہوا ہے نواز شریف نے کہاکہ وہ جنرل مشرف کے ان بیان کو کوئی اہمیت نہیں دیتے ، مشرف پاکستان کے آئینی اور قانونی حکمران نہیں۔نہ مشرف نے پاک بھارت تعلقات سمیت دیگر اہم امورپر پارلیمنٹ کو اعتماد میں لیا جہاں ایسے اہم معاملات پر بحث کی جاتی ہے ۔مسئلہ کشمیر کے بارے میں انہوں نے کہاکہ کشمیرپاکستان اور بھارت کے درمیان اہم ایشو ہے ۔ مشرف،بے نظیر ڈیل پر انہیں نے کہاکہ بے نظیر نے ملک میں جمہوریت کی بحالی کیلئے ہمارے ساتھ کیا گیا معاہدہ توڑ کر فوجی آمرکچھ لو ،کچھ دو کی بنیاد پر ڈیل کرلی جوانتہائی قابل افسوس بات ہے ۔

__________________