ابن جلال

خود امن قائم کریں گے: دیر میں قبائلی لشکر کا قیام
شاور۔۔باجوڑ ایجنسی اور سوات کے درمیان واقع دیر بالا میں اتوار کے روز ایک روایتی جرگے میں طالبان جنگ جوؤں کے خلاف اور قیامِ امن کو یقینی بنانے کے لیے 20 مسلح افراد پر مشتمل ایک لشکر بنانے کا فیصلہ کیا گیا ہے۔

جرگے میں دو بڑے قبیلوں کے تقریباً آٹھ سو رہنماؤں نے شرکت کی۔ سابق ممبر صوبائی اسمبلی اور جماعتِ اسلامی کے رہنما ملک بیرم خان نے وائس آف امریکہ کو تفصیلات بتاتے ہوئے کہا کہ جرگے میں یہ فیصلہ کیا گیا ہے کہ یہاں نہ فوج کو آنےدیا جائے گا اور نہ ہی طالبان کو اور ہم اپنا امن و امان خود قائم کریں گے۔

جرگے کے بارے میں عوامی نیشنل پارٹی کے رہنما انور خان نے اپنا مؤقف بیان کرتے ہوئے کہا کہ ہم اپنا دفاع خود کریں گے کیوں کہ دفاعی افواج سے بھی ہمیں کوئی خاص امید نہیں ہے کہ وہ ہمیں تحفظ دے سکے اور نہ ہی طالبان سے کوئی امید ہے۔

شرکا نے سوات اور باجوڑ میں تشدد کے واقعات پر افسوس کا اظہار کرتے ہوئے متاثرہ لوگوں کو امن فراہم کرنے میں مدد دینے کی پیش کش کی۔

ادھر طالبان جنگ جوؤں نے منگورہ شہر کے نواحی قصبے امان کوٹ میں بجلی کے گرڈ سٹیشن کو دھماکے سے اڑا دیا، جس کے بعد علاقے میں بجلی کی فراہمی معطل ہو گئی ہے۔