خرم شہزاد خرم

خلاء کے مسافروں کے لئے نئے سکّے


یہ سکّے پولیمر سے بنائے گئے ہیں جو نہ چپکنے والے برتن بنانے میں استعمال ہوتا ہے
سائنسدانوں نے خلاء میں سفر کرنے والوں کے لئے نئے سکّے ڈیزائن کر لیے ہیں۔
ان سکّوں کو کوازی یونیورسل انٹرگلیکٹک ڈینومنیشن کا نام دیا گیا ہے اور ان کو اس طرح تیار کیا گیا ہے کہ کے یہ خلائی سفر کا دباؤ برداشت کر سکیں گے اور سفر کرنے والوں کو کوئی نقصان نہیں پہنچائیں گے۔

برطانیہ کی یونیورسٹی آف لیسٹر اور نیشنل سپیس سینٹر کے سائنسدانوں نے یہ سکّے ٹریولیکس ایکسچینج نامی کمپنی کے لئے تیار کیے ہیں۔

یونیورسٹی آف لیسٹر کے جارج فریزر نے کہا کہ پیسے ادا کرنے کے جتنے بھی طریقے، جیسے نقد رقم اور کریڈٹ کارڈ وغیرہ خلاء میں استعمال نہیں کیے جا سکتے کیونکہ نوکیلی چیزیں خلاء میں سفر کرنے والوں کو شدید نقصان پہنچا سکتی ہیں۔ کریڈٹ کارڈ کی مقناطیشی پٹّی خلائی شعاعوں کی وجہ سے کام کرنا چھوڑ دے گی۔

یہ سکّے پولیمر سے بنائے گئے ہیں جو نہ چپکنے والے برتن یا نان سٹک پینز بنانے میں استعمال ہوتا ہے۔

مختلف مالیت کے سکّے مخلتف سائز میں بنائے گئے ہیں

نیشنل سپیس سینٹر کے سائنسدانوں نے پیشنگوئی کی ہے کہ اگلے پانچ سال میں خلاء میں لوگوں کا سفر کرنا معمول کی بات ہو جائےگی اور سنہ دو ہزار پچاس تک چاند پر رہنے کے انتظامات ہو جانے کے بہت امکانات ہیں۔

پروفیسر فریزر نے بی بی سی کو بتایا کے ہوا یا گیس سے بھرے ہوئے خلائی ہوٹل بننے کے بعد خلاء میں رہنا آسان ہوجائے گا۔

ٹریولیکس نے کہا کہ مستقبل قریب میں لوگ خلاء میں سفر کرنے کے لئے ہماری دکانوں میں آ کر یہ سکّے مانگیں گے۔ ایک خلائی سکّے یا کؤیڈ کی قیمت 6.25 پونڈ کے برابر ہوگی۔

__________________