عبدالقدوس

اسلام آباد (جنگ نیوز) حکومت اور ذرائع ابلاغ کے نمائندوں نے ذرائع ابلاغ سے متعلق معاملات حل کرنے کیلئے پیشرفت سے اتفاق کیا ہے، ذرائع ابلاغ کے ادارے پاکستان پریس کونسل کیلئے اپنے نام آئندہ ماہ کے پہلے ہفتہ تک فراہم کریں گے جبکہ صحافیوں کے خلاف ایف آئی آر کی رجسٹریشن کے متعلق معاملہ مناسب سطح پر اٹھانے کا فیصلہ کیا گیا ہے۔ یہ فیصلے جمعرات کو یہاں اطلاعات و نشریات کے وزیر نثار اے میمن کے ساتھ سی پی این ای، اے پی این ایس اور پی ایف یو جے کے سربراہوں کے ایک مشترکہ اجلاس میں کئے گئے۔ اے پی این ایس کے صدر حمید ہارون، سی پی این ای کے صدر فصیح اقبال، پی ایف یو جے کے صدر ہما علی، اے پی این ایس کے سیکرٹری جنرل قاضی محمد اسلم، سی پی این ای کے سیکرٹری جنرل وامق زبیری اور اے پی این ایس کے ایگزیکٹو ڈائریکٹر ڈاکٹر تنویر اے طاہر نے میڈیا اداروں کی نمائندگی کی۔ اجلاس میں فیصلہ کیا گیا کہ نیوز پیپرز، نیوز ایجنسیز، بک رجسٹریشن ترمیمی آرڈیننس 2007ء، پاکستان پریس کونسل آرڈیننس 2002ء میں شامل ضابطہ اخلاق جس پر میڈیا اداروں نے تشویش کا اظہار کیا تھا، میں باہمی مشاورت کے ذریعے مناسب ترمیم کی جائے گی۔ اجلاس میں اتفاق کیا گیا کہ ذرائع ابلاغ کے ادارے پاکستان پریس کونسل کیلئے اپنی نامزدگیاں آئندہ ماہ کے پہلے ہفتے تک جمع کرائیں گے جبکہ یہ بھی اتفاق کیا گیا کہ صحافیوں کے خلاف ایف آئی آر کی رجسٹریشن کا معاملہ مناسب سطح پر اٹھایا جائے گا۔ اجلاس سے خطاب کرتے ہوئے وفاقی وزیر نے کہا کہ میں پاکستان کے کسی بھی شہری خاص طور پر میڈیا کے خلاف جسمانی کارروائی کے خلاف ہوں۔ انہوں نے زور دیا کہ ملک میں شفاف، آزادانہ اور غیر جانبدارانہ انتخابات منعقد کرنے کیلئے حکومت اور ذرائع ابلاغ کے درمیان سازگار ماحول ضروری ہے۔ نثار میمن نے بعض مقامات پر میڈیا نمائندوں کے خلاف تشدد کے ناخوشگوار واقعات پر تشویش کا اظہار کیا۔ انہوں نے کہا کہ صحافی میرے بچوں کی طرح ہیں اور یہ پیغام میں نے سندھ، سرحد کے گورنر اور سندھ، سرحد اور پنجاب کے وزراء اعلیٰ تک پہنچایا ہے۔ انہوں نے کہا کہ میڈیا سے متعلق کوئی بھی معاملہ ہو اسے حل کرنے کیلئے مجھ تک پہنچایا جائے۔ اجلاس میں سیکرٹری اطلاعات سیّد انور محمود، ایڈیشنل سیکرٹری ملک فضل الرحمن، پرنسپل انفارمیشن آفیسر رشید احمد اور ڈائریکٹر جنرل آئی پی سیّد فیاض حسین نے بھی شرکت کی۔

__________________