خرم شہزاد خرم

حکومت تاجروں کو جھوٹی تسلی دے کر جان چھڑا رہی ہے، جے یو پی



کراچی (پ ر) جمعیت علمائے پاکستان کے مرکزی نائب صدر محمد صدیق راٹھور ایڈووکیٹ، محمد سلیم الدین قریشی ایڈووکیٹ، شبیر ابو طالب، عقیل انجم قادری و دیگر نے کورنگی اور انڈسٹریل ایریا، قائد آباد، ابراہیم حیدری، لیمارکیٹ اور لیاری میں متاثرہ مارکیٹوں کا دورہ کیا۔ اس موقع پر میمن سوشل فورم کے مقصود میمن، پرانا حاجی کیمپ ایسوسی ایشن کے اکرم خان، الیکٹرونکس ایسوسی ایشن کے عبدالرشید نورانی، کراچی مارکیٹس الائنس کے شفیع میمن، پلاسٹک ایکسپورٹرز کے عارف بکانی اوریونس تنولی و عباس علی چوہدری سمیت دیگر تاجروں نے ان سے ملاقات کی اور اپنے مسائل سے آگاہ کرتے ہوئے حکومت سندھ پر شدید نکتہ چینی کی۔ تاجروں نے کہا کہ کراچی چیمبر کی پریس کانفرنس گورنر سندھ کے خلاف چارج شیٹ ہے، صرف کراچی میں ہی اربوں روپے کا نقصان ہوچکا ہے جس پر حکومت سندھ، وفاقی حکومت، سٹی گورنمنٹ اور سرکاری جماعتیں محض ڈرامے کر رہی ہیں اور صرف فہرستیں طلب کرکے تاجروں کو جھوٹی تسلیاں دے کر جان چھڑائی جا رہی ہے جبکہ تاحال کوئی عملی اقدام نہیں اٹھایا گیا۔ تاجر رہنماؤں نے کراچی چیمبر کے رہنما سراج قاسم تیلی و دیگر کو زبردست خراج تحسین پیش کرتے ہوئے کہا کہ چیمبر کے رہنماؤں نے زبردست جرأت کا مظاہرہ کرتے ہوئے لوٹ مار سے تاجروں کو ہونے والے نقصانات اور لاقانونیت پر گورنر سندھ اور سٹی ناظم کے کھوکھلے دعوؤں کو بے نقاب کیا ہے، انہوں نے امید ظاہر کی کہ بڑے صنعتکار اور تاجر رہنما اسی طرح ذاتی مفادات کو بالائے طاق رکھتے ہوئے تمام تاجروں کے حقوق کیلئے آواز بلندکرتے رہیں گے۔ اس موقع پر گفتگو کرتے ہوئے جے یو پی کے رہنماؤں نے کہا کہ لوٹ مار کے وقت تو سٹی گورنمنٹ کے شکایتی مراکز سوتے رہے اب فہرستیں طلب کرنا صرف ڈرامہ ہے، انہوں نے کہا کہ تاجروں کو الزام تراشی کی نہیں مالی مدد کی ضرورت ہے لہٰذا انہیں فوری معاوضہ ادا کیا جائے اور اس معاملے پر سیاست سے باز رہا جائے۔