عبدالقدوس

جیکب آباد : پی ایس 15 سے پی پی پی کے میر حسن کھوسہ کامیاب
جیکب آباد (نامہ نگار) پی ایس 15 ٹھل کے 27 پولنگ اسٹیشنوں پر دوبارہ پولنگ جاری ہے پولنگ اسٹیشنوں پر پولیس اور رینجرز کی بھاری نفری تعینات ہے اور ایک پولنگ اسٹیشن مکمل طور پر احتجاجاً بند کردیا گیا ہے۔ تفصیلات کے مطابق 18 فروری کو ہونے والے عام انتخابات میں ہی ایس 15 ٹھل کے مذکورہ پولنگ اسٹیشنوں میں بڑے پیمانے پر ہونے والی دھاندلیوں کے پیش نظر الیکشن کمیشن نے ان 27 پولنگ اسٹیشنوں پر دوبارہ پولنگ کرانے کا حکم دیا تھا۔ اس حکم کے خلاف ق لیگ کے امیدوار ڈاکٹر سہراب خان سرکی نے اسلام آباد ہائی کورٹ سے اسٹے لے لیا تھا اس اسٹے کے خلاف پیپلز پارٹی کے امیدوار میر حسن خان کھوسہ نے سپریم کورٹ میں اپیل داخل کی تھی۔ سپریم کورٹ نے اسلام آباد ہائی کورٹ کے اسٹے کو رد کرتے ہوئے الیکشن کمیشن کے فیصلے کو بحال کردیا۔ فیصلے کے بعد 27 پولنگ اسٹیشن پر دوبارہ پولنگ کرانے کے لئے ہنگامی بنیادوں پر انتظامات کئے۔ ق لیگ کے امیدوار ڈاکٹر سہراب سرکی نے احتجاج الیکشن کا بائیکاٹ کردیا ہے جس کے باعث ان کے آبائی پولنگ اسٹیشن گڑھی حسن سرکی میں پولنگ مکمل بند کردی گئی اور عملے کو انتخابی عمل سے روک دیا گیا جبکہ دیگر پولنگ اسٹیشن میں انتخابات پرامن طریقے سے ہورہے ہیں پولیس اور رینجرز کی بھاری نفری تعینات ہے۔ دریں اثناء غیر سرکاری نتائج کے مطابق پیپلز پارٹی کے میر حسن خان کھوسہ کامیاب قرار پائے ہیں۔ ق لیگ کے ڈاکٹر سہراب خان سرکی کے بائیکاٹ کے باعث ووٹ ڈالنے کی شرح 10 فیصد سے بھی کم رہی 5 پولنگ اسٹیشنوں پر ایک ووٹ بھی نہیں ڈالا گیا 27 پولنگ اسٹیشن پر دوبارہ ہونے والی پولنگ میں پی بی کے میر حسن کھوسہ نے 5 ہزار 854 ووٹ حاصل کئے جبکہ ڈاکٹر سہراب سرکی کو صرف 455 ووٹ ملے۔ مجموعی طور پر پی پی کے امیدوار میر حسن کھوسہ 43 ہزار 989 ووٹ حاصل کر کے کامیاب رہے جبکہ ق لیگ کے امیدوار ڈاکٹر سہراب خان سرکی نے 15 ہزار 440 ووٹ حاصل کئے۔

__________________