عبدالقدوس

لندن /کراچی(نمائندگان جنگ/جنگ نیوز)جیو کی بندش اورمیڈیا پر پابندیوں کیخلاف لندن ، ٹیکساس ، نیویارک ، ٹورنٹو، بارسلونا،برمنگھم اور پاکستان کے مختلف شہروں میں مظاہرے کئے گئے،تفصیلات کے مطابقلندن میں ہائی کمیشن کے باہر ایک زبردست احتجاجی مظاہرہ کیا گیا۔ فری پاکستان کے نام پر منعقد کئے جانے والے اس مظاہرہ میں عمران خان کی سابق اہلیہ، ریسپکٹ پارٹی کے ممبر پارلیمنٹ جارج گیلووے ، حنا جیلانی، دانشور طارق علی کے علاوہ تحریک انصاف کے کارکنوں، یونیورسٹیوں میں پاکستانی اساتذہ اور بڑی تعداد میں زیر تعلیم پاکستانی طلبہ اور پیپلز پارٹی کے کارکنوں نے شرکت کی۔ لندن میں پاکستانی صحافی بھی سیاہ پٹیاں باندھ کر شریک ہوئے۔ شرکا دو گھنٹے تک سخت سردی کے باوجود گو مشرف گو، مشرف کا جو یار ہے غدار ہے، جیو پر پابندی ختم کرو، جیو کو جینے دو، پریس کو رہا کرو، عمران خان کو رہا کروکے نعرے لگاتے رہے،دوسری جانب امریکی ریاست ٹیکساس کے شہر کرولٹن ڈیلاس میں پیپلزپارٹی کی جانب سے پاکستان میں ایمرجنسی، آئین اور ججوں کی بحالی اورجیو سمیت تمام نجی چینلوں کی بندش کے خلاف مظاہرہ کیا گیا۔مزید برآں نیویارک میں پاکستانی صحافیوں نے ایک زبردست احتجاجی مظاہرہ کیا۔ پاکستانی امریکی صحافیوں جن میں پرنٹ اور الیکٹرانک میڈیا سے تعلق رکھنے والے صحافی شامل تھے شدید سردی اور تیز برفانی ہواؤں کے باوجود دو گھنٹے تک پاکستانی قونصل خانے کے باہر احتجاج کر تے رہے۔ پاکستان پیپلز پارٹی برمنگھم نے پاکستانی قونصلیٹ کے سامنے احتجاجی مظاہرہ کیا۔ مظاہرین گو مشرف گو، ہم چاہتے ہیں آزادی، ہم مانگیں آزادی، ججز کو بحال کرو، میڈیا کو آزاد کرو، ایمرجنسی کو ختم کرو، لیڈر شپ کو رہا کرو اور اقتدار پرامن منتقل کرو کے نعرے لگاتے رہے۔پاکستان میں ایمرجنسی کے نفاذ اور تمام نیوز چینلز کو بند کرنے کے خلاف گزشتہ روز بارسلونا میں ایک بڑا احتجاجی مظاہرہ کیا گیا۔جماعت اسلامی حیدرآباد کے زیر اہتمام اتوار کو جیو ٹیلی ویژن نیٹ ورک کی نشریات پر پابندی ‘ سیاسی‘ سماجی رہنماؤں و کارکنوں ‘وکلاء اور صحافیوں کو گرفتار کرکے پابند سلاسل بنانے کے خلاف ایک احتجاجی مظاہرہ کیا گیا ۔حکومت کی طرف سے جیو نیوز بند کرانے پر چنی گوٹھ میں متعدد شہریوں نے احتجاجاً کیبل کنکشن کٹوا دئیے، بہاولپور میں پی ایف یو جے( دستوری گروپ )نے نے احتجاجی مظاہرہ کیا مقررین نے ”جیو“ کی بندش اور میڈیا پر پابندیوں کی شدید مذمت کی ۔ میڈیا پر پابندیوں کے خلاف پاکستان فیڈرل یونین آف جرنلسٹس کی کال پر لاہور پریس کلب میں بھوک ہڑتالی کیمپ لگایا گیا۔ سکھر سے جنگ نیوز کے مطابق میڈیا پر پابندی کے خلاف سکھر پریس کلب میں علامتی بھوک ہڑتال جاری ہے۔

__________________