خرم شہزاد خرم

جیو ٹی وی کی ویب سائٹ پر انتخابات کے بارے میں بھرپور اور جامع معلومات دستیاب



کراچی (جنگ نیوز) ملک میں عام انتخابات پیر 18 فروری کو منعقد ہو رہے ہیں۔ پہلے الیکشن کمیشن نے قومی اور چاروں صوبائی اسمبلیوں کے انتخابات کے لئے8 جنوری کی تاریخ مقرر کی تھی تاہم لیاقت باغ راولپنڈی میں سابق وزیراعظم اور پیپلزپارٹی کی رہنما بینظیر بھٹو کو فائرنگ اور خودکش دھماکے میں شہید کردیا گیا۔ قومی تاریخ کے اس سب سے بڑے سانحے اور سیاسی دہشت گردی کی سب سے افسوسناک کارروائی کے بعد ملک بھر میں خونریز ہنگامے، جلاؤ گھیراؤ، توڑ پھوڑ اور لوٹ مار کے واقعات نے امن و امان کی فضا ایسی کردی جس کے نتیجے میں الیکشن کمیشن کو انتخابات 18 فروری تک ملتوی کرنا پڑے۔ اس وقت ملک میں امن و امان کی صورتحال معمول پر آ رہی ہے اور تمام سیاسی پارٹیاں بشمول پیپلزپارٹی انتخابات کے لئے اپنی مہم دوبارہ شروع کر چکی ہیں۔ اس وقت ملک بھر میں ہر خاص و عام کے پاس صرف ایک موضوع بحث ہے اور وہ ہے عام انتخابات۔انتخابات کے حوالے سے جیو نیوز پر معلومات سے بھرپور دلچسپ مباحثوں پر مشتمل پروگرام پیش کئے جا رہے ہیں۔ جیو ٹی وی نیٹ ورک کی جانب سے اپنے ناظرین اور مداحوں کے لئے ان کی سہولت کے پیش نظر الیکشن کے حوالے سے بھرپور معلومات صرف ٹی وی تک ہی محدود نہیں رکھیں بلکہ معلومات کی فراہمی کا سلسلہ انٹرنیٹ تک وسیع کردیا ہے۔ جیو ٹی وی کی ویب سائٹ www.geo.tv پر الیکشن کے حوالے سے ہر قسم کی معلومات حاصل کی جا سکتی ہیں۔ جیو نیوز کی ملک بھر میں کیبل پر پابندی کی وجہ سے اس وقت دلچسپ اور مستند معلومات کے حصول کے لئے جیو ٹی وی کی ویب سائٹ انٹرنیٹ صارفین کی بھرپور توجہ کا مرکز بنی ہوئی ہے۔ اس ویب سائٹ پر چیف الیکشن کمشنر جسٹس ریٹائرڈ قاضی محمد فاروق کی تقریر کا مکمل متن، الیکشن کے لئے ضابطہ اخلاق، انتخابی شیڈول، نشستوں اور امیدواروں کی تعداد، ان کے کوائف، حلقوں کی معلومات، اعدادوشمار، انتخابی نشانات، ملکی انتخابات کی تاریخ، مختلف سیاسی جماعتوں کے منشور، پاکستان کی مردم شماری کے ریکارڈ، اخبار میں انتخابات کے حوالے سے شائع ہونے والی خبروں، تصویروں، معروف کالم نگاروں کے کالم، بلاگ، گزشتہ انتخابات کے ریکارڈ شامل ہیں۔