عبدالقدوس

کراچی (جنگ نیوز) جیو ٹی وی سے عید کے اسپیشل پروگراموں کا سلسلہ ابھی رکنے بھی نہ پایا تھا کہ یومِ قائداعظم اور کرسمس کے معلوماتی اور تفریح سے بھرپور پروگراموں کا سلسلہ شروع ہو گیا۔ جیو ٹی وی نے مسلمانوں کے مذہبی تہوار عیدالاضحی کے ساتھ ساتھ 25دسمبر کوکرسمس کے دن پر عیسائیوں کے مذہبی جذبات کا بھی بھرپور خیال رکھا ہے۔ جیو ٹی وی سے کرسمس کے موقع پر خصوصی پروگرام پیش کیے جائیں گے۔ جیو ٹی وی سے پیش کیے جانے والے بچوں کے ٹاک شو ”بچے من کے سچے“ میں کرسمس کے حوالے سے گفتگو کی جائے گی۔ چرچ میں ریکارڈ شدہ پروگرام ”بچے من کے سچے“ 06 بج کر05 منٹ پر پیش کیا جائے گا۔ اس کے علاوہ جیوٹی وی سے علمائے کرام سے گفتگو پر مبنی معروف مذہبی پروگرام ”عالم آن لائن“ بھی کرسمس اسپیشل پیش کیا جائے گا۔ اس پروگرام کی ریکارڈنگ چرچ میں کی گئی ہے۔ اس پروگرام میں معروف نوجوان اسکالر و میزبان ڈاکٹر عامر لیاقت حسین حضرت عیسیٰ  کی پیدائش کے حوالے سے معلوماتی گفتگو جیو ٹی وی سے 07بج کر05منٹ پر پیش کی جائے گی۔ بابائے قوم قائد اعظم محمد علی جناح کے یوم پیدائش کے موقع پر خصوصی پروگرام پیش کررہے ہیں ان میں” نظریہ قائد اور پاکستانی معیشت“ پروگرام شامل ہے۔ قیام پاکستان کے وقت سیکریٹری خزا نہ کے عہدے پر فائز شخصیت کے ساتھ دلچسپ گفتگو پیش کی جائے گی۔ قیام پاکستان کے وقت حکومت کو بلینک چیک دینے والی ایک اہم شخصیت کی باتیں، قائد اعظم کی حکومتی حکمت عملی اور منشور موضوع گفتگو ہوگا۔ شرکا میں سابق سیکرٹری خزانہ آفتاب احمد خان، سینئر بزرگ تاجر حمید آدمجی، سینئر اسٹاک بروکر فیروز قاسم شامل ہیں۔ پروگرام کی میزبان عظمیٰ الکریم ہیں۔ یہ پروگرام منگل کی شب پیش کیا جائے گا۔ یوم قائد کے حوالے سے جیو ٹی وی پر دوپہر تین بجے خصوصی پروگرام ” بابا کے دیس میں“ پیش کیا جائے گا۔ یہ ایک ٹیلی پلے ہے جس میں ان مسلمانوں کی حالت زار بیان کی گئی ہے جو قیام پاکستان کیلئے قربانیاں دینے کے باوجود برصغیر کی تقسیم کے بعد بھارت ہی میں رک گئے ان کی جدوجہد اور 60 برس بعد انہیں آج بھی جو مسائل درپیش ہیں ان پرمبنی یہ ٹیلی پلے جیو ٹی وی سے پیش کیا جائے گا۔ اس کے علاوہ رات 8 بجے خصوصی ڈرامہ ” کل“ اور اسی دن رات دس بجے ایک اور خصوصی کھیل ”واپسی“ پیش کیا جائے گا۔

__________________