عبدالقدوس

برسلز (ایجنسیاں،جنگ نیوز) پاکستان اور بیرونی دنیا میں جیو ٹی وی کی نشریات کی بندش کے خلاف یورپی ممالک فرانس، اٹلی، ہالینڈ ، بیلجیئم ، اسپین اور پرتگال میں مقیم پاکستانی صحافیوں نے شدیدمذمت کرتے ہوئے مطالبہ کیا ہے کہ ملک میں فوری طور پر ٹی وی چینلز کی نشریات کو بحال کیا جائے بصورت دیگر ہم یورپ سے احتجاجی تحریک شروع کریں گے۔میلان سے نمائندہ جنگ کے مطابق جیو کی بندش اور عدلیہ پرشب خون مارنے کیخلاف اٹلی میں جیو نیوز کے نمائندے اور پاکستان پریس کلب اٹلی کے صدر جاوید کنول نے چوبیس گھنٹے کی بھوک ہڑتال کی۔اس موقع پر انہوں نے اٹلی میں مقیم صحافیوں کے اجتماع سے خطاب کیا۔اجتماع سے چوہدری شبیر احمد،چوہدری بشیر احمد ،چوہدری امجد اور چوہدری افتخار احمد نے بھی خطاب کیا۔ فرانس سے صاحبزادہ عتیق الرحمان نے کہا کہ ہر حکومت نے میڈیا کو اپنے راستے میں رکاوٹ سمجھ کر زیر کرنے کی ہمیشہ کوشش کی ہے لیکن پاکستانی صحافیوں نے قربانیاں دیکر اور عوام کو ملکی حالات سے باخبر رکھ کر ملک میں ایک منفرد مقام بنایا ہے ۔ سینئر صحافی منظور خان جنجوعہ نے کہا کہ جیو ٹی وی کی بندش اور صحافیوں پر تشدد حکمرانوں کی پریشانی اور بدحواسی کا مظہر ہے۔ اٹلی کے شہر روم سے چوہدری اعجاز پیارا نے کہا کہ ٹی وی نشریات کی بندش سراسر زیادتی ہے۔ حکومت ایک طرف یہ کہتی ہے ہم ملک کو آگے لیکر جانا چاہتے ہیں اور دوسری طرف میڈیا پر ایسی پابندیاں عائد کر رہی ہے۔ ہالینڈ سے سینئر صحافی خالد حمید فاروقی اور ملک وسیم نے کہا کہ جنرل مشرف نے ملک میں بربریت کا دور شروع کیا ہے ۔ جنرل مشرف میڈیا کی آزادی کا بڑاچرچا کرتے تھے لیکن جونہی خود پر بات آئی تو تمام آزادی بھول گئے۔ بیلجیئم سے وقارملک نے جیو ٹی وی کی بندش صحافت اور عوام پر کاری ضرب ہے۔اسپین سے زاہد مصطفی اعوان اور ناصر جنجوعہ نے کہا کہ حکومت نے اظہار رائے کی آزادی پر حملہ کرکے اور پڑھے لکھے طبقے وکلا اور صحافیوں پر تشدد کر کے بہت بڑی زیادتی کی ہے۔ پرتگال سے طاہر شمیم خان نے نجی ٹی وی چینلز کی بندش اور نئے پیمرا قوانین کی شدید مذمت کرتے ہوئے کہا کہ آٹھ سال بعد بھی موجودہ حکومت اپنی ناکامیوں کی ذمہ داری کا اعتراف کرنے کی بجائے ٹی وی چینلز پر پابندیاں لگا کر قوم کو حقائق جاننے سے محروم کیا گیا ہے۔

__________________