ابن ضیاء

کراچی (اسٹاف رپورٹر) گورنر سندھ ڈاکٹر عشرت العباد خان نے صوبے میں آٹے اور بجلی کے بحران کا سخت نوٹس لیتے ہوئے متعلقہ حکام کو ہدایت کی ہے کہ وہ اس ضمن میں عوام کو ریلیف پہنچانے کیلئے فوری اقدامات کریں۔ انہوں نے واضح کیا کہ یہ متعلقہ لوگوں کی نااہلی ہے کہ کچھ علاقوں میں عوام کو آٹے کی دستیابی نہیں ہورہی ہے۔ گورنر سندھ نے کہا کہ حیدرآباد میں اس سلسلے میں بہتر صورتحال رہی جس پر وہاں کی انتظامیہ قابل ستائش ہے ۔ گورنر نے کہا کہ اگر متاثرہ علاقوں میں صورتحال کی بہتری کیلئے فوری طور پر اقدامات نہ کئے گئے تو متعلقہ ذمہ داران کے خلاف سخت کاروائی عمل میں لائی جائے گی۔ انہوں نے خاص طور پر ناجائز منافع خوروں‘ ذخیرہ اندوزوں اور اس کارٹیل میں شریک دیگر لوگوں کے خلاف کاروائی یقینی بنانے پر بھی زور دیا۔ گورنر سندھ ڈاکٹر عشرت العباد خان نے بجلی کی فراہمی میں بار بار کے تعطل کو بھی بلاجواز اور نااہلی قرار دیا۔ انہوں نے کہا کہ ان مہینوں میں بجلی کی فراہمی میں شکایات نہایت افسوسناک اور ناقابل برداشت ہیں۔ انہوں نے اس ضمن میں بھی عوام کو ریلیف پہنچانے کیلئے ہنگامی بنیادوں پر کام کرنے پر زور دیا۔