عبدالقدوس

جنرل پرویز نہ رہے تب بھی ایٹمی پروگرام محفوظ رہے گا،امریکا کو پاکستان کی یقین دہانی


گزشتہ برسوں میں حکومت پاکستان نے کئی پاکستانی عہدیداروں کے ذریعے بش انتظامیہ کو خاموشی سے یہ پیغام بھیجا ہے کہ اگر جنرل پرویز مشرف نہ رہے تب بھی ایٹمی پروگرام محفوظ رہے گا ۔ یہ انکشاف نیویارک ٹائمز نے اتوار کے صفحہ اول کے تجزیے میں کیا ہے۔ انتظامیہ کے ایک سینئر عہدیدار نے نیویارک ٹائمز کو بتایا کہ 18 اکتوبر کو بینظیر بھٹو کے جلوس میں جو دھماکا ہوا ہے وہ بش انتظامیہ کے آخری 15 ماہ کے لئے ایک بھیانک خواب ہے۔ انتظامیہ کے بعض سابق اور موجودہ حکام کا خیال ہے کہ پاکستان میں امریکی اثر و نفوذ اب محدود ہے اورجنرل پرویز بہت کمزور ہیں اور بش انتظامیہ نے صرف شخص واحد یعنی جنرل پرویز پر سرمایہ لگایا ہے۔ زیادہ تر امریکی حکام کی رائے ہے کہ جب تک پاکستان آرمی متحد ہے ایٹمی ہتھیاروں پر سخت کنٹرول برقرار رہے گا۔ بعض ماہرین کا خیال ہے کہ صرف جنرل پرویز کو میانہ رو جنرل سمجھنا غلطی ہے۔ ان کی رائے میں پاکستان آرمی کی زبردست اکثریت میانہ رو ہے اور جنرل پرویز کے بغیر بھی میانہ رو رہے گی۔ نئے وائس چیف آف آرمی اسٹاف جنرل اشفاق پرویز کیانی کو بھی ایک میانہ رو امریکی دوست جنرل سمجھا جاتا ہے۔ نیویارک ٹائمز کے مطابق یہ الزام بھی لگایا جا رہا ہے کہ جنرل پرویز اپنے اقتدار کو بچانے میں اتنے مصروف رہے ہیں کہ وہ قبائلی علاقوں میں القاعدہ کے خلاف جنگ پر توجہ نہیں دے سکے۔

__________________