محمدعمر

یورپی یونین کے ممالک ایئرپورٹ پر مسافروں کی چیکنگ کے لیے باڈی سکرینگ مشینیں لگانے کے معاملے میں بٹ گئے ہیں۔

کرسمس کے موقع نائجیرائی باشندے کی طرف سے امریکی طیارے کو اڑانے کی کوشش کے بعد یورپ کے تین ممالک، ہالینڈ، اٹلی اور برطانیہ نے اعلان کیا ہے کہ امریکہ جانے والے تمام مسافروں کی باڈی سکرینگ کرنے کے لیے ایئرپورٹ پر جدید سکینر نصب کیے جائیں گے۔

بعض یورپی ممالک کا موقف ہے کہ ان جدید سکینرز کے استعمال سے لوگوں کی پرائیوسی متاثر ہوتی ہے۔ بیلجیئم کے ٹرانسپورٹ سیکرٹری نے کہا ہے کہ سکیورٹی کے اقدامات ضرورت سے زیادہ کیے ہیں اور یورپی ایئرپورٹوں پر پہلے ہی تلاشی کا مناسب نظام اپنی جگہ موجود ہے۔

سپین نے کہا ہے کہ وہ ایئرپورٹس پر جدید سکینرز نصب کرنے کا فیصلہ یورپی کمیشن کے فیصلے کی روشنی میں کرے گا۔ فرانس اور جرمنی نے اس سلسلے میں کوئی واضح موقف اختتار نہیں کیا ہے۔

ہالینڈ ایسے سکینر استعمال کر رہا ہے جس میں مائیکرویو کے ذریعے مسافروں کے جسم کو دیکھا جا سکتا ہے۔

یورپی کمیشن نے 2008 میں سکینر کے استعمال سے متعلق قانون کا مسودہ یورپی پارلیمنٹ کی جانب سے اعتراضات کے بعد واپس لے لیا تھا۔ یورپی پارلیمنٹ کے ممبران نے اعتراض کیا تھا ان سکینر کے ذریعے لوگوں کی پرائیویسی اور ان کی صحت متاثر ہوسکتی ہے۔

یورپ کے انسانی حقوق کے بعض اداروں کا موقف ہے کہ سکینر سے لوگوں کے پرائیوسی متاثر کی جا رہی ہے کیونکہ ان سکینر سے جو تصویر بنتی ہے وہ تقریباً ننگی ہوتی ہے۔

__________________
ناراضگی ظاہر کرنا دل میں برائی رکھنے سے بہتر ہے۔