عبدالقدوس

اسلام آباد ( رپورٹ: … دلشاد عظیم) جمعیت علمائے اسلام کے اعلیٰ سطح کے رہنما اور ایم ایم اے کی ممتاز آواز حافظ حسین احمد کو جے یو آئی کا ٹکٹ دینے سے انکار کردیا گیا ہے، جس کی وجہ ججوں کے مسئلے پر ان کا سخت موقف ہے۔ ان کے ایک قریبی ذریعے نے دی نیوز کوبتایا کہ حافظ حسین احمد کو ایم ایم اے اور ان کی جماعت جے یو آئی نے سیاسی طور پر تنہا چھوڑ دیا ہے اور اب وہ اس قابل نہیں کہ دوبارہ پارلیمنٹ میں داخل ہوسکیں۔ وہ دیگر سیاسی جماعتوں یا اتحاد میں شامل ہونے کے آپشنز پر غور کر رہے ہیں کیونکہ ان کی جماعت نے، جس سے وہ 20 سال سے وابستہ تھے، ان کے آبائی حلقے میں بھی تنہا چھوڑ دیا ہے۔ بلوچستان میں ایم ایم اے کی اندرونی لڑائی مرکز سے بھی زیادہ دلچسپ ہے۔ مذہبی جماعتوں کے اتحاد کے صوبائی رہنماؤں نے اپنے سربراہ مولانا محمد خان شیرانی کو ایم ایم اے سے نکال دیا ہے اور اپنا امیدوار کھڑا کر دیا ہے۔ مولانا شیرانی نے اتحاد کے دیگر ارکان کے مشورے کے بغیر بلوچستان سے امیدواروں کے ناموں کا اعلان کردیا تھا۔ اگرچہ کہ مولانا شیرانی کی مخالف جماعتیں حافظ حسین احمد کی حمایت کر رہی ہیں لیکن اس کے باوجود بھی ہوسکتا ہے کہ وہ دوبارہ منتخب نہ ہوسکیں کیونکہ جے یو آئی (ف) نے چاغی سے اپنا امیدوار کھڑا کر دیا ہے اور اسی حلقے سے ق لیگ کے سردار فتح محمد بھی انتخاب لڑ رہے ہیں۔ دی نیوز کے رابطہ کرنے پر حافظ حسین احمد نے کہا کہ وہ اب بھی اپنی جماعت جے یو آئی (ف) کے وفادار ہیں لیکن اس بات کا فیصلہ نہیں کر پا رہے کہ آیا موجودہ حالات میں کوئی پیش رفت کی جائے یا نہیں۔ انہوں نے کہا کہ چونکہ جے یو آئی نے مجھے پارٹی ٹکٹ کے حوالے سے واضح جواب نہیں دیا لہٰذا میں الیکشن لڑ بھی سکتا ہوں اور نہیں بھی۔ انہوں نے کہا کہ میرے پاس کاغذات واپس لینے کیلئے اب بھی وقت موجود ہے۔ ایک سوال کے جواب میں انہوں نے مزید کہا کہ انہوں نے اپنی جماعت چھوڑی ہے اور نہ ہی انہیں جماعت سے نکالا گیا ہے۔ انہوں نے کہا میں جے یو آئی (ف) کا پیرو کار اور مولانا فضل الرحمن میرے رہنما ہیں اور یہی وجہ ہے کہ میں انتخاب نہیں لڑ رہا۔ جے یو آئی (ف) کے سیکریٹری جنرل مولانا غفور حیدری نے رابطہ کرنے پر بتایا کہ حافظ حسین احمد کو پارٹی کے نظم و ضبط کی خلاف ورزی پر ٹکٹ نہیں دیا گیا، ان کی پارٹی رکنیت ختم نہیں کی گئی لیکن انہوں نے بطور آزاد امیدوار اپنے کاغذات جمع کرائے ہیں۔

__________________