خرم شہزاد خرم

تھانوں اور ٹارچرسیلوں میں بند کارکنوں کو فوری رہا کیا جائے،آصف زرداری



کراچی(اسٹاف رپورٹر)پاکستان پیپلز پارٹی کے شریک چیئرمین سابق سینیٹر آصف علی زرداری نے ملک بھر سے پاکستان پیپلز پارٹی کے ہزاروں کارکنان کی گرفتاری،تھانوں اور غیر سرکاری ٹارچرسیلوں میں ان پر غیر انسانی اوربہیمانہ تشدد کی پرزور مذمت کرتے ہوئے ان کی فوری رہائی کا غیر مشروط مطالبہ کیا ہے۔بلاول ہاؤس میڈیا سیل کے مطابق آصف علی زرداری نے کہا ہے کہ پاکستان پیپلز پارٹی کے کارکنان پہلے ہی غم سے نڈھال ہیں اور انہیں مسلسل تشدداور ہراساں کرنا خطرے سے خالی نہیں۔انہوں نے کہا کہ صدمہ کی حالت میں ہونے کے باوجود پاکستان پیپلز پارٹی الیکشن میں حصہ لینے جارہی ہے تاکہ فیڈریشن کو بچایا جاسکے۔تاہم غیر جمہوری قوتوں نے پاکستان پیپلز پارٹی کے کارکناں کی پکڑ دھکر شروع کردی ہے تاکہ انارکی پھیلے اور الیکشن سے راہ فرار اختیار کی جاسکے۔آصف زرداری نے کہا کہ پاکستان پیپلز پارٹی حکمرانوں کو انتخابات سے بھاگنے نہیں دے گی۔انہوں نے حکمرانوں سے مطالبہ کیا کہ وہ شرپسندوں اور لوٹ مارکرنے والوں کا کھوج لگائیں اس لئے کہ پاکستان پیپلز پارٹی کے کارکنان کبھی بھی ایسی حرکتوں میں ملوث نہیں ہوئے۔آصف علی زرداری نے تمام ضلعی صدور کو ہدایت کی ہے کہ وہ قانون نافذ کرنے والے اداروں کے ہاتھوں گرفتار شدہ تمام کارکنان کی فہرستیں نوڈیرو ہاؤس راونہ کریں۔