عبدالقدوس

اسلام آباد (جنگ نیوز) صدر پرویز مشرف نے کہا ہے کہ وہ عام انتخابات میں کسی خاص سیاست دان یا سیاسی جماعت کی حمایت نہیں کریں گے تمام سیا سی جماعتوں کو برابر کے مواقع دیئے جا رہے ہیں سوات میں آپریشن کامیابی سے جاری ہے اور عسکریت پسندوں کے دہشت گردوں سے رابطوں کے حوالے سے اہم شواہد بھی ملے ہیں۔ان خیالات کا اظہار انہوں نے سی این این سے بات چیت کرتے ہوئے کیا۔ صدرپرویز مشرف سے انتہائی تندوتیز سوالات کا تحمل مزاجی جواب دیا۔ملکی صورت حال پر صدر مشرف نے کہا کہ ایک ہفتہ بعد ملک سے ایمر جنسی اٹھا لی جائے گی اور عبوری آئینی حکم ختم کر دیا جائے گا ایمر جنسی کے نفاذ کے بعد حالات میں بہتری آئی ہے سوات آپریشن کے حوالے سے صدر نے کہا کہ یہ آپریشن کامیابی سے جاری ہے عسکریت پسندوں کے بڑے بڑے ٹھکانے تباہ کر دیئے گئے ہیں کئی کو ہلاک کیا گیا ہے اور عسکریت پسندوں کے بڑے اہم دہشت گردوں سے رابطوں کے حوالے سے ثبوت بھی ملے ہیں جن کی تفصیلات وہ نہیں بتا سکتے انہوں نے کہا کہ پاکستان دہشت گردی کے خلاف جنگ اپنے مفاد میں لڑ رہا ہے اور ہم اس جنگ میں کسی بھی دوسرے ملک سے بڑھ کر کردار زیادہ ادا کیا ہے اور قربانی بھی ہم نے زیادہ دی ہے۔اس لئے ہم پر کوئی انگلی نہیں اٹھا سکتا ایک سوال پر انہوں نے کہا کہ وہ انتخابات میں کسی خاص سیاست دان یا کسی سیاسی جماعت کی سائیڈ نہیں لے رہے ان کے لئے تمام سیاسی جماعتیں برابر ہیں اور سب کو برابر کے مواقع دیئے جارہے ہیں کہ تمام سیاسی جماعتیں آئیں اور انتخابی عمل میں حصہ لیں انہوں نے کہا کہ عام انتخابات صاف و شفاف اور منصفانہ انعقاد میں کسی کو کوئی شک نہیں ہونا چاہیے غیر ملکی مبصرین بھی انتخابات کا جائزہ لے سکتے ہیں انہیں ہم تمام سہولیات دیں گے۔ انہوں نے کہا کہ جو پارٹی انتخابات میں اپنی اکثریت ثابت کر دے گی اسے حکومت بنانے کی دعوت دی جائے گی ۔دریں اثناء اسلام آباد سے اے پی پی کے مطابق صدر پرویز مشرف نے کہا ہے کہ قومی تعمیر میں تعلیم اہم کردار کی حامل اور تمام سطحوں پر ترقی کا بنیادی جزو ہے اورحکومت تعلیم کو اولین ترجیح دیئے ہوئے ہے۔ انہوں نے یہ بات ہفتہ کو پاک آسٹریا انجینئرنگ سائنس و ٹیکنالوجی یونیورسٹی پراجیکٹ کے ایک وفد سے گفتگو کرتے ہوئے کہی۔ ا اس موقع پر آسٹریا کے وزیر برائے سائنس و تحقیق ڈاکٹر جوہانس ہین نے منصوبے میں ذاتی دلچسپی اور تعاون پر صدر کا شکریہ ادا کرتے ہوئے کہا کہ یہ منصوبہ سالانہ پانچ ہزار طالب علموں کو تعلیم دینے کے ساتھ ساتھ ٹیکنالوجی پارک کے قیام سے پاکستان میں خطیر سرمایہ کاری بھی لائے گا۔

__________________