ابن جلال

دنیا کے بعض حصوں میں شرح خواندگی میں اضافے کی رفتار تشویشناک حد تک کم ہے۔ یونیسیف
اقوام متحدہ ……… دنیا کے بعض حصوں میں شرح خواندگی میں اضافے کی رفتار تشویشناک حد تک کم ہے۔ یہ بات اقوام متحدہ کے ادارہ برائے تعلیم، سائنس و ثقافت یونیسیف کی طرف سے جاری رپورٹ میں بتائی گئی۔ رپورٹ کے مطابق ان پڑھ بالغ افراد کی تعداد میں 10 کروڑ کی کمی ہوئی لیکن ملینیئم ترقیاتی اہداف کے تحت 2015ء تک دنیا بھر میں شرح خواندگی کو 87 فیصد تک لے جانا طے کیا گیا ہے۔ رپورٹ میں براعظم ایشیا کے جنوبی اور مغربی ممالک اور بعض افریقی ممالک میں شرح خواندگی میں اضافے کی رفتار تیز کرنے کیلئے نئی حکمت عملی تشکیل دینے کی ضرورت پر زور دیا گیا ہے جن میں بعض غریب طبقہ کو تعلیمی سہولتوں کی فراہمی پر خاص طور پر توجہ دی جانی چاہئے۔ رپورٹ کے مطابق اس وقت دنیا بھر میں موجود ناخواندہ بالغ افراد کی تین چوتھائی تعداد بنگلہ دیش، بھارت، چین، برازیل اور نائیجریا سمیت 15 ممالک میں مقیم ہے جبکہ ایسے افراد کی کل تعداد 77 کروڑ 40 لاکھ ہے۔ رپورٹ میں یہ بھی بتایا گیا کہ ناخواندہ بالغوں کی ایک بڑی تعداد خواتین پر مشتمل ہے اور گذشتہ 3 سال کے دوران اس تناسب میں کوئی تبدیلی نہیں آئی۔ رپورٹ میں کہا گیا کہ بالغوں میں شرح خواندگی میں اضافے کی رفتار یہی رہی تو 2015ء تک اس حوالہ سے 127 ممالک میں ملینیئم ترقیاتی اہداف حاصل نہیں ہو سکیں گے۔ رپورٹ میں شرح خواندگی میں اضافے کی رفتار تیز کرنے کیلئے مٶثر اقدامات کی ضرورت پر زور دیا گیا ہے۔
******************
عالمی ادارہ خوراک نے کمبوڈیا میں سکولوں کے طلباء کو ناشتے کی مفت فراہمی دوبارہ شروع کر دی
نوم پنھ ………اقوام متحدہ کے عالمی ادارہ خوراک نے فنڈز کی فراہمی کے بعد کمبوڈیا میں لاکھوں سکول کے طلباء کو ناشتہ کی مفت فراہمی دوبارہ شروع کر دی۔ عالمی ادارہ خوراک کے جاری کردہ بیان کے مطابق کمبوڈیا میں اس وقت 1344 سکولوں کے 450000 طلباء کو ناشتے کیلئے چاول و دیگر اشیاء فراہم کی جا رہی ہیں۔ قبل ازیں عالمی ادارہ خوراک نے عالمی سطح پر خوراک کی قیمتوں میں بے پناہ اضافے اور فنڈز کی کمی کے باعث سکول کے طلباء کو ناشتے کی فراہمی مئی میں مجبوراً بند کر دی تھی۔ عالمی ادارہ خوراک کے ڈائریکٹر بریڈے بوسیٹو نے بتایا کہ عالمی برادری سے کی گئی اپیل کے جواب میں بہت سے ممالک نے ورلڈ فوڈ پروگرام کیلئے عطیات دئیے جس کے بعد کمبوڈیا میں سکول کے طلباء کو ناشتے کی مفت فراہمی ایک بار پھر بحال کر دی گئی ہے۔
******************