عبدالقدوس

اسلام آباد( جنگ نیوز) امیر جماعت اسلامی پاکستان قاضی حسین احمد نے کہا ہے کہ ہم محترمہ بینظیر بھٹو کے قتل کی تحقیقات کے حوالے سے پیپلز پارٹی کے مطالبے کی حمایت کرتے ہیں، انہوں نے کہا کہ 1973ء کے آئین میں ہر مسئلے کا حل موجود ہے لیکن تمام فیصلے آئین کی بجائے صدر کی مرضی سے کیے جاتے ہیں پاکستانی عوام اپنے کشمیری بھائیوں کے شانہ بشانہ ہیں اور حق خودارادیت کی جدوجہد میں ہمیشہ ان کا ساتھ دیں گے۔ عام انتخابات کا انعقاد فراڈ ہے، موجودہ سیٹ اپ کے تحت عام انتخابات منصفانہ اور صاف وشفاف نہیں ہو سکتے۔ ان خیالات کا اظہار انہوں نے گزشتہ روز یہاں غیر ملکی صحافیوں کے ایک وفدسے بات چیت کرتے ہوئے کیا۔ ایک سوال کے جواب میں قاضی حسین احمد نے کہا کہ کشمیری عوام اپنے حق خودارادیت کیلئے جدوجہد کر رہے ہیں اور پاکستانی عوام اپنے کشمیری بھائیوں کی جدوجہد میں ان کے شانہ بشانہ ہیں اورہمیشہ ان کا ساتھ دیں گے۔ انہوں نے کہا کہ حکومتوں کی پالیسیاں اور ترجیحات بدلتی رہتی ہیں لیکن ہماری کشمیر پالیسی مستقل ہے جس میں کوئی تبدیلی نہیں ہوگی۔ انہوں نے کہا کہ ملک میں عام انتخابات کا انعقاد فراڈ ہے کیونکہ حکومت نے آئینی تقاضے پورے نہیں کیے آئین کے تحت چیئرمین سینیٹ کو نگران صدر ہونا چاہئے لیکن چیئرمین سینیٹ کو نگران وزیر اعظم بنا دیا گیا۔ انہوں نے کہا کہ 1973ء کے آئین میں ہر مسئلے کا حل موجود ہے لیکن تمام فیصلے آئین کی بجائے صدر کی مرضی سے کیے جاتے ہیں۔ موجودہ سیٹ اپ کے تحت عام انتخابات کا صاف وشفاف انعقاد ممکن نہیں اس لیے اے پی ڈی ایم نے فراڈ الیکشن کا بائیکاٹ کرنے کا فیصلہ کیا ۔ دہشتگردی کے خلاف جنگ کے حوالے سے سوال کے جواب میں انہوں نے کہا کہ امریکی صدر بش کی پالیسیوں نے پوری دنیا میں امریکا کو بدنام کیا اور پوری دنیا میں امریکا کو ناپسند کیا جاتا ہے۔ انہوں نے کہا کہ افغانستان کی تاریخ ہے کہ یہاں کے عوام غیر ملکی تسلط قبول نہیں کرتے، امریکا افغانستان میں ناکام ہوچکا ہے اورا پنی غلطیاں اور ناکامیاں دوسروں کے سرڈال رہا ہے۔ انہوں نے محترمہ بینظیر بھٹو کے قتل کی مذمت کرتے ہوئے کہا کہ جماعت اسلامی محترمہ بینظیر بھٹو کے قتل کے حوالے سے ایسی تحقیقات کی حمایت کرتی ہے جس کا مطالبہ پیپلز پارٹی کر رہی ہے۔

__________________