عبدالقدوس

بے نظیر نے مرتضیٰ بھٹوقتل کی تحقیقات غیر ملکی ماہرین سے کیوں نہیں کرائی،شجاعت

مسلم لیگ( ق) کے سربراہ اور سابق وزیر اعظم چوہدری شجاعت حسین نے کراچی بم دھماکوں کی غیر ملکی اداروں سے تحقیقات کرانے کے بے نظیر کے مطالبے پر کہا کہ اگر یہ مطالبہ مان لیا جائے تو سوال یہ پیدا ہوتا ہے کہ بینظیر کے بھائی مرتضیٰ بھٹو کے قتل کی غیر ملکی ایجنسیوں سے کیوں تحقیقات نہیں کرائی گئیں یہ مطالبہ اُس وقت کیوں نہیں کیا گیا، اپنے بھائی کیلئے تو اُنہوں نے ایسا کوئی قدم نہیں اُٹھایا حالانکہ وہ خود وزیر اعظم تھیں۔ انہوں نے کہاکہ بے نظیر سے اب کوئی مفاہمت نہیں ہوسکتی اور نہ ہوگی۔ اب تک ہم نے اُن کے ساتھ صبر و تحمل کا مظاہرہ کیا ہے اب ہم بھی الزامات اور غیر ذمہ دارانہ بیانات کا اُسی شد و مد سے جواب دیں گے جس طرح کا لب و لہجہ بے نظیر نے اختیار کر رکھا ہے۔ وہ جیو نیوز کے پروگرام پارلیمنٹ کیفے ٹیریا میں اسماء چوہدری سے خصوصی گفتگو کررہے تھے۔ اُنہوں نے کہا کہ الیکشن سے قبل بلدیاتی اداروں کو نہیں توڑا جائے گا البتہ الیکشن کے دنوں میں ان کے اشتہارات محدود کردیئے جائیں گے۔ پرویز الٰہی پر کراچی بم دھماکوں کے حوالے سے چوہدری شجاعت حسین نے سوالیہ انداز میں کہا کہ پرویز الٰہی کے پاس کتنے خودکش بمبار ہیں کہ بے نظیر پر حملوں کیلئے دستیاب ہوں گے؟۔ بے نظیر پرویز الٰہی کی سیاسی قوت سے خوفزدہ ہیں اور اُنہیں اپنے لئے سیاسی خطرہ سمجھتی ہیں اس لئے الزامات کی سیاست کررہی ہیں اور بے سروپا الزامات عائد کررہی ہیں۔ اُنہوں نے ایک سوال پر کہا کہ نوازشریف وطن واپس نہیں آئیں گے جب تک سعودی فرمانروا نہیں چاہیں گے۔

بشکریہ
جنگ

__________________